ທ່ານເລຂາທິການໃຫຍ່ To Lam ມີການເຈລະຈາກັບນາຍົກລັດຖະມົນຕີມາເລເຊຍ Anwar Ibrahim

ທ່ານເລຂາທິການໃຫຍ່ To Lam ແລະ ທ່ານນາຍົກລັດຖະມົນຕີ Anwar Ibrahim ໄດ້ແບ່ງປັນທັດສະນະຮ່ວມກ່ຽວກັບການເພີ່ມທະວີການເຊື່ອມໂຍງດ້ານເສດຖະກິດມຸ່ງໄປເຖິງການພັດທະນາແບບຍືນຍົງ, ສ້າງແຫຼ່ງກຳລັງໃຫ້ແກ່ໄລຍະພັດທະນາໃໝ່ຂອງ 2 ປະເທດ.

ທ່ານເລຂາທິການໃຫຍ່ To Lam ແລະ ທ່ານນາຍົກລັດຖະມົນຕີ ມາເລເຊຍ Anwar Ibrahim ກ່າວຄຳເຫັນຕໍ່ນັກຂ່າວ. (ພາບ: ທອງລຸນ/VNA)

ຕາມນັກຂ່າວ VNA ແລ້ວ, ຕອນບ່າຍວັນທີ 21/11, ພາຍຫຼັງພິທີຕ້ອນຮັບຢ່າງສົມກຽດຢູ່ສຳນັກງານນາຍົກລັດຖະມົນຕີ, ທ່ານເລຂາທິການໃຫຍ່ To Lam ໄດ້ມີການພົບປະກັບທ່ານນາຍົກລັດຖະມົນຕີ ມາເລເຊຍ Anwar Ibrahim ຢ່າງເປັນທາງການ.

ທ່ານນາຍົກລັດຖະມົນຕີ Anwar Ibrahim ໄດ້ໃຫ້ການຕ້ອນຮັບທ່ານເລຂາທິການໃຫຍ່ To Lam ແລະ ພັນລະຍາ ແລະ ຄະນະຜູ້ແທນຂັ້ນສູງພັກ ແລະ ລັດ ຫວຽດນາມ ໃນການຢ້ຽມຢາມ ມາເລເຊຍ ຢ່າງເປັນທາງການ; ໄດ້ແບ່ງປັນຄວາມຮູ້ສຶກດີຕໍ່ປະທານ ໂຮ່ຈີມິນ, ໄດ້ຊົມເຊີຍບັນດາວິລະຊົນປະຫວັດສາດແຫ່ງການຕໍ່ສູ້ຍາດເອົາເອກະລາດແຫ່ງຊາດ, ແລະ ຄວາມປະທັບໃຈອັນດີຕໍ່ປະເທດຊາດ ແລະ ປະຊາຊົນ ຫວຽດນາມ ໃນໄລຍະທີ່ທ່ານມາຢ້ຽມຢາມ ຫວຽດນາມ ໃນຄັ້ງນີ້.

ທ່ານນາຍົກລັດຖະມົນຕີ Anwar Ibrahim ຢືນຢັນວ່າ: ມາເລເຊຍ ຍາມໃດກໍ່ສະໜັບສະໜູນ ຫວຽດນາມ ໂດຍກົງຈາກໄລຍະຕົ້ນແຫ່ງການປະຕິຮູບ, ເຂົ້າຮ່ວມສະມາຄົມປະຊາຊາດອາຊີຕາເວັນອອກສຽງໃຕ້ (ອາຊຽນ) ກໍ່ຄືໃນຂະບວນການພັດທະນາໃນປະຈຸບັນ.

ທ່ານນາຍົກລັດຖະມົນຕີ Anwar Ibrahim ອວຍພອນທ່ານ Comrade To Lam ໄດ້ຮັບການເລືອກຕັ້ງເປັນເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ, ເນັ້ນໜັກວ່າ ການຢ້ຽມຢາມມີຄວາມໝາຍ, ສ້າງກຳລັງໜູນຢ່າງແຮງເພື່ອເພີ່ມທະວີຄວາມເຂົ້າໃຈເຊິ່ງກັນ ແລະ ກັນ, ຊຸກຍູ້ ແລະ ເພີ່ມທະວີການຮ່ວມມືລະຫວ່າງ 2 ປະເທດໃນໄລຍະຈະມາເຖິງ.

ທ່ານເລຂາທິການໃຫຍ່ To Lam ສະແດງຄວາມປິຕິຊົມຊື່ນທີ່ໄດ້ມາຢ້ຽມຢາມ ມາເລເຊຍ ອີກ; ຂອບໃຈຕໍ່ການຕ້ອນຮັບອັນອົບອຸ່ນ ແລະ ເຄົາລົບນັບຖື ແລະ ຄວາມຮັກແພງອັນໃກ້ຊິດ ເຊິ່ງລັດຖະບານ ແລະ ປະຊາຊົນມາເລເຊຍ ແລະ ທ່ານນາຍົກລັດຖະມົນຕີ Anwar Ibrahim ໄດ້ມອບເປັນສ່ວນຕົວເຖິງທ່ານເລຂາທິການໃຫຍ່ ແລະ ຄະນະຜູ້ແທນຂັ້ນສູງຫວຽດນາມ, ພ້ອມທັງຕີລາຄາສູງຄວາມຮູ້ສຶກພິເສດຂອງທ່ານນາຍົກລັດຖະມົນຕີທີ່ມີຕໍ່ປະທານ ໂຮ່ຈີມິນ.

ທ່ານເລຂາທິການໃຫຍ່ To Lam ເນັ້ນໜັກວ່າ: ການຢ້ຽມຢາມໄດ້ປະກອບສ່ວນສຳຄັນເຂົ້າໃນການເພີ່ມທະວີການພົວພັນມິດຕະພາບທີ່ເປັນມູນເຊື້ອ, ຄວາມເຂົ້າອົກເຂົ້າໃຈເຊິ່ງກັນ ແລະ ກັນ, ເປີດກາລະໂອກາດຮ່ວມມື, ເລິກເຊິ່ງ ແລະ ເພີ່ມທະວີການຮ່ວມມືລະຫວ່າງສອງປະເທດຂຶ້ນສູ່ລະດັບສູງໃໝ່, ເພື່ອຜົນປະໂຫຍດຂອງປະຊາຊົນສອງປະເທດ, ເພື່ອສັນຕິພາບ, ການຮ່ວມມື ແລະ ພັດທະນາຢູ່ພາກພື້ນ ແລະ ໃນໂລກ.

ທ່ານນາຍົກລັດຖະມົນຕີ Anwar Ibrahim ຊົມເຊີຍ ຫວຽດນາມ ບັນລຸໄດ້ເກືອບ 40 ປີແຫ່ງການປ່ຽນແປງໃໝ່, ໃນນັ້ນມີບັນດາໝາກຜົນສຳຄັນໃນວິວັດການຟື້ນຟູ ແລະ ພັດທະນາເສດຖະກິດ - ສັງຄົມ, ແກ້ໄຂຜົນຮ້າຍຢ້ອນຫຼັງຈາກສົງຄາມ ແລະ ຄວາມຫຍຸ້ງຍາກຈາກໄພທຳມະຊາດ.

ທ່ານນາຍົກລັດຖະມົນຕີ Anwar Ibrahim ໄດ້ສະແດງຄວາມປະທັບໃຈຕໍ່ການປ່ຽນແປງຢ່າງຕັ້ງໜ້າ ແລະ ຮອບດ້ານຂອງຫວຽດນາມ, ພິເສດແມ່ນການພັດທະນາເສດຖະກິດ ແລະ ອຸດສາຫະກຳສຳຄັນ; ຂ້າພະເຈົ້າເຊື່ອໝັ້ນວ່າ, ພາຍໃຕ້ການຊີ້ນຳຂອງພັກ, ລັດຫວຽດນາມ ແລະ ທ່ານເລຂາທິການໃຫຍ່ To Lam, ຫວຽດນາມ ຈະບັນລຸເປົ້າໝາຍພັດທະນາຂອງຕົນ.

ທ່ານເລຂາທິການໃຫຍ່ To Lam ຕີລາຄາສູງການພັດທະນາຢ່າງຕັ້ງໜ້າຂອງມາເລເຊຍ; ຊົມເຊີຍມາເລເຊຍຕໍ່ຜົນສຳເລັດທີ່ສຳຄັນໃນດ້ານຕ່າງໆໃນຫຼາຍປີຜ່ານມາພາຍໃຕ້ການນຳພາຂອງລັດຖະບານປະສົມໂດຍທ່ານນາຍົກລັດຖະມົນຕີ Anwar Ibrahim.

ທ່ານເລຂາທິການໃຫຍ່ To Lam ເຊື່ອໝັ້ນວ່າ, ພາຍໃຕ້ການຊີ້ນຳຂອງທ່ານນາຍົກລັດຖະມົນຕີ Anwar Ibrahim, ມາເລເຊຍ ຈະປະຕິບັດຍຸດທະສາດພັດທະນາຮອບດ້ານໃນໄລຍະໃໝ່, ພິເສດແມ່ນ “ແຜນການເສດຖະກິດ Madani - ສ້າງຄວາມເຂັ້ມແຂງໃຫ້ແກ່ປະຊາຊົນ” ແລະ “ແຜນແມ່ບົດອຸດສາຫະກຳໃໝ່ 2030”.

ການນຳສອງທ່ານໄດ້ປຶກສາຫາລື ແລະ ໄດ້ສະແດງຄວາມປິຕິຊົມຊື່ນ ແລະ ເພິ່ງພໍໃຈຕໍ່ການພັດທະນາຢ່າງແຂງແຮງ, ເລິກເຊິ່ງ ແລະ ຮອບດ້ານຂອງການພົວພັນລະຫວ່າງຫວຽດນາມ - ມາເລເຊຍ ນັບແຕ່ການສ້າງຕັ້ງການພົວພັນທາງການທູດເມື່ອປີ 1973, ພິເສດແມ່ນບັນດາຜົນງານທີ່ສຳຄັນໃນການຮ່ວມມື 2 ຝ່າຍ ແລະ ຫຼາຍຝ່າຍ ນັບແຕ່ສອງປະເທດໄດ້ຍົກລະດັບການພົວພັນຂຶ້ນເປັນຄູ່ຮ່ວມມືຍຸດທະສາດປີ 2015.

ທ່ານນາຍົກລັດຖະມົນຕີ Anwar Ibrahim ຢືນຢັນວ່າ ມາເລເຊຍ ຖືເປັນສຳຄັນການພົວພັນກັບຫວຽດນາມ; ຂອບໃຈການໜູນຊ່ວຍຢ່າງຕັ້ງໜ້າ ແລະສຳຄັນຂອງຫວຽດນາມ ສຳລັບລັດຖະບານ, ປະຊາຊົນ ແລະ ວິສາຫະກິດ ມາເລເຊຍ.

ທ່ານເລຂາທິການໃຫຍ່ To Lam ຢືນຢັນວ່າ: ຫວຽດນາມ ຍາມໃດກໍ່ຂອບອົກຂອບໃຈ ແລະ ຂອບໃຈມາເລເຊຍ ທີ່ໄດ້ພ້ອມກັບ ແລະ ໜູນຊ່ວຍ ຫວຽດນາມ ໃນວິວັດການພັດທະນາ ແລະ ເຊື່ອມໂຍງເຂົ້າກັບ ອາຊຽນ ແລະ ສາກົນ. ຫວຽດນາມ ຖືເປັນສຳຄັນ ແລະ ໃຫ້ບຸລິມະສິດສູງໃນການຊຸກຍູ້ການພົວພັນກັບມາເລເຊຍ.

ການນຳສອງປະເທດເນັ້ນໜັກວ່າ, ສອງປະເທດມີຫຼາຍຈຸດທີ່ຄ້າຍຄືກັນດ້ານວັດທະນະທຳ ແລະ ປະຫວັດສາດ, ແບ່ງປັນຫຼາຍຜົນປະໂຫຍດທີ່ສຳຄັນ, ພວມກ້າວເຂົ້າສູ່ໄລຍະພັດທະນາໃໝ່, ທັງປາດຖະໜາຢາກປະກອບສ່ວນຢ່າງຕັ້ງໜ້າເຂົ້າໃນສັນຕິພາບ, ຄວາມໝັ້ນຄົງ ແລະ ການພັດທະນາລວມ.

ທ່ານເລຂາທິການໃຫຍ່ To Lam ແລະທ່ານນາຍົກລັດຖະມົນຕີ Anwar Ibrahim ເຫັນດີເປັນເອກະພາບຍົກລະດັບການພົວພັນ ຫວຽດນາມ - ມາເລເຊຍ ໃຫ້ເປັນຄູ່ຮ່ວມມືຍຸດທະສາດຮອບດ້ານ, ເພື່ອຜົນປະໂຫຍດຂອງປະຊາຊົນ 2 ປະເທດ, ເພື່ອສັນຕິພາບ, ການພັດທະນາແບບຍືນຍົງ ແລະ ວັດທະນາຖາວອນຂອງ ອາຊຽນ ແລະ ໃນໂລກ. ການນຳສອງທ່ານໄດ້ມີການປຶກສາຫາລືຢ່າງເລິກເຊິ່ງ ແລະ ບັນລຸໄດ້ຄວາມຮັບຮູ້ຮ່ວມທີ່ສຳຄັນກ່ຽວກັບທິດທາງໃຫຍ່ເພື່ອຊຸກຍູ້ການຮ່ວມມືໃນບັນດາເສົາຄ້ຳສຳຄັນຂອງການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດ.

ທ່ານເລຂາທິການໃຫຍ່ To Lam ແລະ ທ່ານນາຍົກລັດຖະມົນຕີ Anwar Ibrahim ໄດ້ເຫັນດີເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງຢ່າງໜັກແໜ້ນ; ເພີ່ມທະວີການຮ່ວມມືດ້ານປ້ອງກັນປະເທດ ແລະ ຄວາມໝັ້ນຄົງ; ປັບປຸງປະສິດທິຜົນການພົວພັນທາງດ້ານພັກ, ລັດ, ລັດຖະບານ ແລະ ສະພາແຫ່ງຊາດ; ເພີ່ມທະວີການແລກປ່ຽນລະຫວ່າງການນຳຂັ້ນສູງຂອງສອງປະເທດ. ການນຳສອງທ່ານໄດ້ເຫັນດີເປັນເອກະສັນຊີ້ນຳບັນດາອົງການທີ່ກ່ຽວຂ້ອງຂອງສອງປະເທດຜັນຂະຫຍາຍໂຄງການເຄື່ອນໄຫວເພື່ອຜັນຂະຫຍາຍການພົວພັນຄູ່ຮ່ວມມືຍຸດທະສາດຮອບດ້ານໄລຍະ 2025-2030.

ການນຳສອງທ່ານເຫັນດີເປັນເອກະພາບຊຸກຍູ້ການຮ່ວມມືພັດທະນາອຸດສາຫະກຳ Halal, ຊຸກຍູ້ບັນດາວິສາຫະກິດຂອງແຕ່ລະປະເທດເປີດກວ້າງການລົງທຶນຢູ່ຕະຫຼາດຂອງປະເທດອື່ນ; ເພີ່ມທະວີການຮ່ວມມືໃນຂົງເຂດວິທະຍາສາດເຕັກໂນໂລຊີ ແລະ ກຳລັງຜະລິດຕະພັນໃໝ່, ໃນນັ້ນມີເສດຖະກິດສີຂຽວ, ນະວັດຕະກຳ, ວິທະຍາສາດເຕັກໂນໂລຢີ, ການຫັນເປັນດີຈີຕອນ, ພະລັງງານສີຂຽວ; ເພີ່ມທະວີການເຂົ້າຮ່ວມໃນຂົງເຂດສໍາຄັນອື່ນໆ.

ທ່ານເລຂາທິການໃຫຍ່ To Lam ຊົມເຊີຍບັນດານະໂຍບາຍ ແລະ ມາດຕະການສະເພາະໂດຍນາຍົກລັດຖະມົນຕີ ມາເລເຊຍ ສະເໜີເພື່ອພັດທະນາການຮ່ວມມືລະຫວ່າງ 2 ປະເທດ, ໃນນັ້ນມີການສ້າງເຄືອຂ່າຍສາຍສົ່ງໄຟຟ້າ ອາຊຽນ ແລະ ເສດຖະກິດທາງທະເລ.

ການນຳສອງປະເທດໄດ້ຕີລາຄາສູງການສົມທົບກັນເປັນປະຈຳຂອງສອງປະເທດ ແລະ ການສະໜັບສະໜູນເຊິ່ງກັນ ແລະ ກັນໃນບັນດາກົນໄກຫຼາຍຝ່າຍ, ພິເສດແມ່ນຢູ່ອາຊຽນ ແລະ ສະຫະປະຊາຊາດ (ສປຊ), ໄດ້ເຫັນດີເປັນເອກະສັນກັນຜັນຂະຫຍາຍການສົມທົບກັນຢ່າງເລິກເຊິ່ງກ່ວາອີກໃນບັນດາບັນຫາສາກົນ.

ທ່ານເລຂາທິການໃຫຍ່ To Lam ຊົມເຊີຍ ແລະ ເຊື່ອໝັ້ນວ່າ ມາເລເຊຍ ຈະສືບຕໍ່ປະຕິບັດບົດບາດເປັນປະທານ ອາຊຽນ ໃນປີ 2025 ຢ່າງສຳເລັດຜົນ, ຊ່ວຍໃຫ້ ອາຊຽນ ຕອບສະໜອງບັນດາສິ່ງທ້າທາຍຢ່າງມີປະສິດທິຜົນ ແລະ ບັນລຸບັນດາການພັດທະນາໃໝ່ໃນການເສີມຂະຫຍາຍບົດບາດເປັນໃຈກາງ. ທ່ານເລຂາທິການໃຫຍ່ To Lam ຢືນຢັນວ່າ ຫວຽດນາມ ຈະຕັ້ງໜ້າໜູນຊ່ວຍ ແລະ ສົມທົບກັບມາເລເຊຍ, ປະກອບສ່ວນຢ່າງມີຄວາມຮັບຜິດຊອບເຂົ້າໃນວຽກງານຮ່ວມຂອງ ອາຊຽນ.

ທ່ານເລຂາທິການໃຫຍ່ To Lam ແລະ ທ່ານນາຍົກລັດຖະມົນຕີ Anwar Ibrahim ຢືນຢັນຄວາມສຳຄັນຂອງການຮັກສາສັນຕິພາບ, ຄວາມໝັ້ນຄົງ, ສະຖຽນລະພາບ, ຄວາມປອດໄພ, ຄວາມເສລີໃນການເດີນເຮືອ ແລະ ການບິນຢູ່ທະເລຕາເວັນອອກ; ແກ້ໄຂການພິພາດໂດຍສັນຕິວິທີ, ບໍ່ນາບຂູ່ຫຼືໃຊ້ກຳລັງ, ແກ້ໄຂການພິພາດໂດຍສັນຕິວິທີ, ສອດຄ່ອງກັບຫຼັກການຂອງກົດໝາຍສາກົນ, ໃນນັ້ນມີສົນທິສັນຍາຂອງສະຫະປະຊາຊາດກ່ຽວກັບກົດໝາຍທະເລປີ 1982 (UNCLOS 1982), ບໍ່ດຳເນີນບັນດາການເຄື່ອນໄຫວທີ່ອາດຈະເພີ່ມຄວາມເຄັ່ງຕຶງ, ສົ່ງຜົນສະທ້ອນເຖິງສັນຕິພາບ ແລະ ສະຖຽນລະພາບຢູ່ທະເລຕາເວັນອອກ.

ການນຳ 2 ທ່ານໄດ້ເຫັນດີຮຽກຮ້ອງໃຫ້ປະຕິບັດຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ຢ່າງຄົບຖ້ວນ, ກຳນົດທິດການປະພຶດຢູ່ທະເລຕາເວັນອອກ (COC) ຢ່າງມີປະສິດທິຜົນ ແລະ ແທດຈິງ, ເໝາະສົມກັບກົດໝາຍສາກົນ, ໃນນັ້ນມີ UNCLOS ປີ 1982, ພ້ອມກັນປະກອບສ່ວນຊຸກຍູ້ທ່າອ່ຽງດີຢູ່ທະເລຕາເວັນອອກ.

ທ່ານເລຂາທິການໃຫຍ່ໄດ້ເຊື້ອເຊີນທ່ານນາຍົກລັດຖະມົນຕີມາເລເຊຍເຂົ້າຮ່ວມເວທີປາໄສອະນາຄົດອາຊຽນ 2025 ທີ່ຈະຈັດຂຶ້ນຢູ່ຫວຽດນາມ.

ທ່ານນາຍົກລັດຖະມົນຕີ Anwar Ibrahim ໄດ້ຮັບຄຳເຊີນຢ່າງດີໃຈ, ສະແດງຄວາມປາດຖະໜາຢາກຊອກຮູ້ປະຫວັດສາດຂອງຫວຽດນາມ ເພີ່ມເຕີມ ແລະ ຢ້ຽມຢາມ ດ້ຽນບຽນຝູ, ເປັນສະຖານທີ່ທີ່ທ່ານນາຍົກລັດຖະມົນຕີຢາກມາແຕ່ດົນນານ.

ທ່ານເລຂາທິການໃຫຍ່ To Lam ແລະ ທ່ານນາຍົກລັດຖະມົນຕີ ມາເລເຊຍ Anwar Ibrahim ໄດ້ເປັນສັກຂີພິຍານການແລກປ່ຽນເອກະສານຮ່ວມມືລະຫວ່າງ 2 ປະເທດ. (ພາບ: ທອງລຸນ/VNA)

ພາຍຫຼັງສິ້ນສຸດການເຈລະຈາ, ທ່ານເລຂາທິການໃຫຍ່ To Lam ແລະ ທ່ານນາຍົກລັດຖະມົນຕີ ມາເລເຊຍ Anwar Ibrahim ໄດ້ເປັນສັກຂີພິຍານພິທີແລກປ່ຽນເອກະສານຮ່ວມມື 2 ສະບັບຄື: ບົດບັນທຶກຄວາມເຂົ້າໃຈກ່ຽວກັບການເພີ່ມທະວີການຮ່ວມມືດ້ານການຄ້າລະຫວ່າງອົງການສົ່ງເສີມການຄ້າຫວຽດນາມ ແລະ ອົງການພັດທະນາການຄ້າພາຍນອກຂອງມາເລເຊຍ.

ບົດບັນທຶກຄວາມເຂົ້າໃຈກ່ຽວກັບການຮ່ວມມືດ້ານພະລັງງານທົດແທນລະຫວ່າງກຸ່ມບໍລິສັດນ້ຳມັນແລະອາຍແກັສແຫ່ງຊາດຫວຽດນາມ (PetroVietnam) ແລະ ກຸ່ມບໍລິສັດນ້ຳມັນແລະອາຍແກັສແຫ່ງຊາດມາເລເຊຍ (Petronas).

ພາຍຫຼັງເປັນສັກຂີພິຍານພິທີມອບຮັບເອກະສານການຮ່ວມມື, ທ່ານເລຂາທິການໃຫຍ່ To Lam ແລະ ທ່ານນາຍົກລັດຖະມົນຕີ Anwar Ibrahim ໄດ້ມີການພົບປະກັບບັນດານັກຂ່າວເພື່ອແຈ້ງໃຫ້ຊາບກ່ຽວກັບໝາກຜົນການເຈລະຈາ./.

ທີ່ມາ