នាវាចម្បាំងអាមេរិកបានវាយប្រហារ

មន្ទីរបញ្ចកោណបាននិយាយថា "យើងដឹងពីរបាយការណ៍នៃការវាយប្រហារលើ USS Carney និងនាវាពាណិជ្ជកម្មនៅសមុទ្រក្រហម ហើយនឹងផ្តល់ព័ត៌មានបន្ថែមក្នុងពេលឆាប់ៗនេះ"។

ក្រសួងការពារជាតិអាមេរិកមិនបានបញ្ជាក់ពីការខូចខាតដល់នាវា USS Carney ដែលជានាវាពិឃាត Arleigh Burke-class ក្នុងការវាយប្រហារនោះទេ។

នាវាពិឃាត USS Carney របស់កងទ័ពជើងទឹកអាមេរិក។ (រូបថត៖ Reuters)

ក្រសួងការពារជាតិអាមេរិកក៏បាននិយាយផងដែរថា មន្ត្រីអាមេរិកមិនទាន់កំណត់អត្តសញ្ញាណជនដៃដល់នៃការវាយប្រហារកាលពីថ្ងៃទី 3 ខែធ្នូនោះទេ។

ក្រុមឧទ្ទាម Houthi របស់ប្រទេសយេម៉ែន បាននិយាយថា ពួកគេបានវាយប្រហារលើនាវាពីរគ្រឿង ដែលភ្ជាប់ទៅនឹងអ៊ីស្រាអែល ជាមួយនឹងយន្តហោះគ្មានមនុស្សបើក និងមីស៊ីល។ ទោះជាយ៉ាងណា ក្រុម Houthis មិនបានទទួលស្គាល់ថាបានកំណត់គោលដៅលើនាវាទ័ពជើងទឹកអាមេរិកទេ។

នេះជាការវាយប្រហារតាមដែនសមុទ្រជាបន្តបន្ទាប់លើផ្លូវដឹកជញ្ជូនក្នុងតំបន់ដែលជាប់ពាក់ព័ន្ធនឹងសង្គ្រាមអ៊ីស្រាអែលនិងក្រុមហាម៉ាស។

មុននេះ អាជ្ញាធរគ្រប់គ្រងពាណិជ្ជកម្មដែនសមុទ្ររបស់ចក្រភពអង់គ្លេសបាននិយាយថា ខ្លួនបានទទួលព័ត៌មានអំពីការវាយប្រហារដោយយន្តហោះគ្មានមនុស្សបើកនៅច្រកសមុទ្រ Bab el-Mandeb នៃសមុទ្រក្រហម។ យោងតាមទីភ្នាក់ងារនេះ យន្តហោះគ្មានមនុស្សបើកដែលមានប្រភពមកពីប្រទេសយេម៉ែន កំពុងប្រតិបត្តិការនៅក្នុងតំបន់នេះ។

ការវាយប្រហារតាមដែនសមុទ្រជាបន្តបន្ទាប់ត្រូវបានគេរាយការណ៍នៅក្នុងដែនទឹកមជ្ឈិមបូព៌ា ខណៈដែលមានការផ្ទុះការប្រយុទ្ធគ្នារវាងអ៊ីស្រាអែល និងក្រុមហាម៉ាស។ នេះបង្កើនហានិភ័យនៃជម្លោះក្នុងតំបន់កាន់តែទូលំទូលាយ។ កាលពីខែមុន ក្រុម Houthis បានចាប់យកកប៉ាល់ដឹកទំនិញដែលមានទំនាក់ទំនងជាមួយនឹងអ៊ីស្រាអែលនៅសមុទ្រក្រហម ក្បែរឆ្នេរយេម៉ែន។

ក្រុម Houthis បានបាញ់មីស៊ីលផ្លោង និងយន្តហោះគ្មានមនុស្សបើកប្រដាប់អាវុធ ទៅកាន់គោលដៅរបស់អ៊ីស្រាអែល ហើយបានប្តេជ្ញាបន្តវាយប្រហារលើនាវាអ៊ីស្រាអែល នៅក្នុងតំបន់នោះ។

លោក Yahya Saree អ្នកនាំពាក្យក្រុម Houthis បានអះអាងទទួលខុសត្រូវចំពោះការវាយប្រហារកាលពីថ្ងៃទី ៣ ខែធ្នូ។ លោកបាននិយាយថា ៖ «នាវា ឬកប៉ាល់របស់អ៊ីស្រាអែលទាំងអស់ដែលពាក់ព័ន្ធនឹងអ៊ីស្រាអែលនឹងក្លាយជាគោលដៅស្របច្បាប់»។

យោងតាម កាសែត Navy Times នាវា USS Carney បានបាញ់ទម្លាក់យន្តហោះគ្មានមនុស្សបើកផលិតដោយអ៊ីរ៉ង់ ដែលធ្វើដំណើរឆ្ពោះទៅកាន់ទីតាំងរបស់ខ្លួនពីទឹកដីដែលគ្រប់គ្រងដោយក្រុម Houthi ក្នុងប្រទេសយេម៉ែន។ ឧប្បត្តិហេតុនេះក៏បានកើតឡើងមួយថ្ងៃបន្ទាប់ពីយន្តហោះគ្មានមនុស្សបើករបស់អ៊ីរ៉ង់មួយគ្រឿងទៀតបានចូលទៅជិតនាវាផ្ទុកយន្តហោះ Dwight Eisenhower ក្នុងដែនទឹកអន្តរជាតិនៃឈូងសមុទ្រអារ៉ាប់ នេះបើតាម Navy Times បានរាយការណ៍។

គង់ អាញ់ (ប្រភព៖ RT)

ប្រភព