ការប្រណាំងដើម្បីបង្កើនហិរញ្ញវត្ថុសម្រាប់ការបោះឆ្នោតប្រធានាធិបតីសហរដ្ឋអាមេរិក

ការរៃអង្គាសប្រាក់ដោយជោគជ័យតែងតែត្រូវបានចាត់ទុកថាជារង្វាស់ដ៏សំខាន់មួយនៅមុនរាល់ការបោះឆ្នោតនៅសហរដ្ឋអាមេរិក។ ការបោះឆ្នោតនៅឆ្នាំនេះ គឺមិនមានករណីលើកលែងនោះទេ ខណៈដែលប្រធានាធិបតីអាមេរិក Joe Biden និងអ្នកកាន់តំណែងមុនរបស់លោក Donald Trump ទាំងពីរបានធ្វើយុទ្ធនាការយ៉ាងគឃ្លើន ដើម្បីរៃអង្គាសថវិកាសម្រាប់ការប្រណាំងទៅកាន់សេតវិមាន។

ប្រធានាធិបតីអាមេរិក Joe Biden និងអ្នកកាន់តំណែងមុនរបស់លោក Donald Trump។ រូបថត៖ CNN

អត្ថប្រយោជន៍របស់ប្រធានាធិបតីដែលកំពុងកាន់អំណាច

កំណត់ត្រារបស់គណៈកម្មាធិការរៀបចំការបោះឆ្នោតសហព័ន្ធបង្ហាញថា យុទ្ធនាការរបស់ប្រធានាធិបតីអាមេរិក Joe Biden មានថវិកាច្រើនជាងបីដងរបស់អតីតប្រធានាធិបតី Donald Trump ។ អត្ថប្រយោជន៍ហិរញ្ញវត្ថុនោះអនុញ្ញាតឱ្យលោក Biden ធ្វើដំណើរទូទាំងប្រទេសដើម្បីធ្វើយុទ្ធនាការនិងប្រមូលប្រាក់បន្ថែមទៀត។ យោងតាមគណៈកម្មការរៀបចំការបោះឆ្នោតសហព័ន្ធនៅក្នុងខែកុម្ភៈ ឆ្នាំ 2024 យុទ្ធនាការរបស់លោក Biden បានរៃអង្គាសប្រាក់បានចំនួន 53 លានដុល្លារ ពោលគឺជិតបីដងច្រើនជាងចំនួន $20 លានដុល្លាររបស់លោក Trump ។ ចំនួនទឹកប្រាក់ដែលភាគីទាំងពីរត្រូវធ្វើយុទ្ធនាការក្នុងខែមីនាក៏មានភាពខុសគ្នាខ្លាំងផងដែរ នៅពេលដែលលោក Biden មានរហូតដល់ 155 លានដុល្លារដែលមាននៅក្នុងគណនីរបស់គាត់ ខណៈដែលលោក Trump មានត្រឹមតែប្រហែល 42 លានដុល្លារប៉ុណ្ណោះ។

គួរកត់សម្គាល់ថាកាលពីសប្តាហ៍មុន ការបង្ហាញខ្លួនរបស់អតីតប្រធានាធិបតីពីររូបគឺលោក Barack Obama និង Bill Clinton រួមជាមួយនឹងតារាជាច្រើនរូបបានជួយយុទ្ធនាការរបស់លោក Biden រកចំណូលបានជាង 25 លានដុល្លារអាមេរិកក្នុងអំឡុងពេលយុទ្ធនាការមួយនៅទីក្រុងញូវយ៉ក។

ចំណែកលោក ដូណាល់ ត្រាំ អតីតប្រធានាធិបតីអាមេរិកបានចំណាយពេលភាគច្រើននៅក្នុងតុលាការនៅទីក្រុងញូវយ៉ក ដោយមានទីប្រឹក្សាផ្នែកច្បាប់របស់លោក ព្យាយាមរកវិធីដើម្បីទទួលបានការផាកពិន័យឡើងវិញ។ ចាប់តាំងពីឈ្នះការតែងតាំងប្រធានាធិបតីពីគណបក្សសាធារណរដ្ឋកាលពីថ្ងៃទី 12 ខែមីនា យុទ្ធនាការរបស់លោក Trump បានរៀបចំព្រឹត្តិការណ៍យុទ្ធនាការតែមួយគត់។ យុទ្ធនាការរបស់លោក Trump បានចង្អុលបង្ហាញអំពីផែនការរៀបចំការប្រមូលផ្តុំយុទ្ធនាការមួយជាមួយនឹងគោលដៅរៃអង្គាសប្រាក់ប៉ាន់ស្មានចំនួន 33 លានដុល្លាររហូតមកដល់ពេលនេះ។ នៅថ្ងៃទី 6 ខែមេសា លោក Trump នឹងជួបជាមួយអ្នកឧបត្ថម្ភដ៏មានសក្តានុពលនៅក្លឹប Mar-a-Lago ក្នុងរដ្ឋ Florida ។

ឱកាសដ៏លើសលប់

យោងតាមក្រុមអ្នកសង្កេតការណ៍ បញ្ហាផ្លូវច្បាប់ដែលលោក Trump កំពុងប្រឈម ផ្តល់ឱ្យគាត់នូវពេលវេលាតិចក្នុងការឈរឈ្មោះក្នុងតំណែង ហើយក៏ជាក្តីកង្វល់សម្រាប់ទាំងអ្នកគាំទ្រ និងអ្នកវិនិយោគផងដែរ។ មនុស្សជាច្រើនបានលើកឡើងពីការព្រួយបារម្ភថាលោក Trump អាចប្រើប្រាស់មូលនិធិដែលបានលើកឡើងដើម្បីទូទាត់វិក្កយបត្រផ្លូវច្បាប់របស់គាត់។ ប្រព័ន្ធផ្សព្វផ្សាយអាមេរិកបានអត្ថាធិប្បាយថា ប្រសិនបើព្រឹត្តិការណ៍នេះត្រូវបានរៀបចំឡើងដោយជោគជ័យ នោះអតីតប្រធានាធិបតី Donald Trump នឹងស៊ុតបញ្ចូលទី “គ្រាប់បាល់ដ៏មានកិត្តិយសមួយប្រឆាំងនឹងលោកប្រធានាធិបតី Joe Biden ។ លើសពីនេះ មូលនិធិចំនួន 33 លានដុល្លារ នឹងជួយសម្រាលបន្ទុកហិរញ្ញវត្ថុមួយចំនួនរបស់លោក Trump ខណៈដែលអតីតប្រធានាធិបតីរូបនេះប្រឈមនឹងការផាកពិន័យសរុបជាង 460 លានដុល្លារ។

ទន្ទឹមនឹងនោះ អំណោយទានរបស់គណៈកម្មាធិការជាតិសាធារណរដ្ឋនាពេលនេះ មានភាពយឺតយ៉ាវពីគណៈកម្មាធិការជាតិប្រជាធិបតេយ្យ។ យោងតាមសាស្ត្រាចារ្យ Paul Whiteley នៅសាកលវិទ្យាល័យ Essex (ចក្រភពអង់គ្លេស) គណបក្សសាធារណរដ្ឋកំពុងចំណាយច្រើនជាងគណបក្សប្រជាធិបតេយ្យនៅក្នុងការបោះឆ្នោតឆ្នាំ 2024 ។ គ្រាន់តែរាប់លុយដែលបានចំណាយក្នុងយុទ្ធនាការបោះឆ្នោតប្រធានាធិបតីអាមេរិកឆ្នាំ 2024 ដោយមិនរាប់បញ្ចូលលុយដែលបានចំណាយលើការបោះឆ្នោតនីតិបញ្ញត្តិ និងថ្នាក់មូលដ្ឋាននៅថ្នាក់រដ្ឋ គណបក្សសាធារណរដ្ឋបានចំណាយ 191 លានដុល្លារនៅដើមខែមីនា ឆ្នាំ 2024។

តួលេខរបស់គណបក្សប្រជាធិបតេយ្យមានត្រឹមតែ ៤៨ លានដុល្លារប៉ុណ្ណោះ។ ភាពខុសគ្នានេះគឺដោយសារតែលោក Joe Biden ស្ទើរតែគ្មានគូប្រជែងសំខាន់នៅក្នុងការបោះឆ្នោតបឋមរបស់គណបក្សប្រជាធិបតេយ្យ ខណៈដែលភាគីសាធារណរដ្ឋមានបេក្ខជនរហូតដល់ 9 នាក់ឈរឈ្មោះ ហើយគណៈកម្មាធិការជាតិសាធារណរដ្ឋត្រូវចំណាយប្រាក់លើយុទ្ធនាការរបស់បេក្ខជនទាំងនេះ។

ថាញ់ ហង្ស សំយោគ

ប្រភព