ກໍ່ສ້າງຕ່ອງໂສ້ການຜະລິດແນວພັນເຂົ້າຂອງແຂວງ

ຕິດຕາມໜັງສືພິມ ໄຕນິງ ໄດ້ທີ່

(BTNO) - ຕອນເຊົ້າວັນທີ 20 ກຸມພາ, ຢູ່ສູນສົ່ງເສີມກະສິກຳ ໄຕນິງ ໄດ້ຈັດກອງປະຊຸມຜັນຂະຫຍາຍການກໍ່ສ້າງຕ່ອງໂສ້ການຜະລິດແນວພັນເຂົ້າແຂວງ.

ເຂົ້າຮ່ວມມີຜູ້ຕາງໜ້າບັນດາສະຫະກອນກະສິກຳຢູ່ບັນດາເມືອງຄື: ເບັນກາວ, ເຈົາແທ່ງ, ໂກດ່າວ ແລະ ເມືອງຈ່າງບັງ; ກັບບັນດາວິສາຫະກິດທັງພາຍໃນ ແລະ ຕ່າງປະເທດ.

ຕາມທ່ານ ຮ່າແທງຕຸ່ງ, ຜູ້ອຳນວຍການສູນສົ່ງເສີມກະສິກຳແລ້ວ, ປະຈຸບັນ, ຊາວກະສິກອນໄຕນິງສ່ວນຫຼາຍຕ້ອງນຳເຂົ້າເມັດເຂົ້າຈາກບັນດາແຂວງອື່ນດ້ວຍລາຄາສູງ, ເຮັດໃຫ້ການຜະລິດມີຄວາມຫຍຸ້ງຍາກ. ໃນຂະນະນັ້ນ, ການຜະລິດແນວພັນເຂົ້າຢູ່ ໄຕນິງ ຍັງມີຂໍ້ຈຳກັດ, ບໍ່ຕອບສະໜອງຄວາມຕ້ອງການຂອງປະຊາຊົນ.

ເພື່ອແກ້ໄຂບັນຫາດັ່ງກ່າວ, ສູນສົ່ງເສີມກະສິກຳໄດ້ຮັບການລົງທຶນຈາກກົມກະສິກຳ ແລະ ພັດທະນາຊົນນະບົດ ໃນບັນດາສິ່ງອຳນວຍຄວາມສະດວກທີ່ທັນສະໄໝເຊັ່ນ: ສາງ, ເຄື່ອງແຍກເມັດພັນ ແລະ ເຄື່ອງອົບແຫ້ງ. ປະຈຸບັນ, ສູນດັ່ງກ່າວມີສາງເຂົ້າ 2 ແຫ່ງທີ່ມີຄວາມສາມາດບັນຈຸກວ່າ 500 ໂຕນ ແລະ 2 ຕູ້ອົບເຂົ້າທີ່ມີກຳລັງການອົບແຫ້ງ 25 ໂຕນ, ໄດ້ລົງທຶນໃໝ່ເຂົ້າໃນຟາມທົດລອງປູກພືດໄຕນິງ. ອຸປະກອນເຫຼົ່ານີ້ຈະຊ່ວຍຫຼຸດຜ່ອນຄ່າໃຊ້ຈ່າຍແຮງງານແລະປັບປຸງປະສິດທິພາບຂອງການຜະລິດແນວພັນເຂົ້າ.

ກອງປະຊຸມເພື່ອແນໃສ່ຊອກຫາວິທີແກ້ໄຂການພັດທະນາແບບຍືນຍົງຂອງຕ່ອງໂສ້ການຜະລິດແນວພັນເຂົ້າ, ຍົກສູງຄຸນນະພາບຜະລິດຕະພັນ, ເພີ່ມມູນຄ່າໃຫ້ຂະແໜງກະສິກຳຂອງແຂວງ.

ທ່ານ ກາວວັນທາ, ຜູ້ອຳນວຍການສະຫະກອນກະສິກຳຟຸ໋ບິ່ງ, ຕາແສງ ຟຸກຈີ໋ ກ່າວຄຳເຫັນທີ່ກອງປະຊຸມ.

ທີ່ກອງປະຊຸມ, ຜູ້ຕາງໜ້າບັນດາສະຫະກອນ, ວິສາຫະກິດໄດ້ແບ່ງປັນກ່ຽວກັບບັນດາຈຸດດີ, ຂໍ້ຄົງຄ້າງໃນການປະຕິບັດການຜະລິດແນວພັນເຂົ້າທີ່ມີຄຸນນະພາບ, ພ້ອມທັງສະເໜີວິທີແກ້ໄຂ, ຂໍ້ສະເໜີແນະກ່ຽວກັບກົນໄກນະໂຍບາຍເພື່ອຊ່ວຍສ້າງລະບົບຕ່ອງໂສ້ການຜະລິດແນວພັນເຂົ້າຂອງແຂວງຢ່າງມີປະສິດທິຜົນ.

ສາງ ແລະ ເຄື່ອງອົບເຂົ້າໃໝ່ໄດ້ລົງທຶນຢູ່ຟາມທົດລອງປູກພືດ ໄຕນິງ.

ພາຍຫຼັງກອງປະຊຸມ, ສູນສົ່ງເສີມກະສິກຳ ໄດ້ຈັດຕັ້ງບັນດາຜູ້ແທນໄປຢ້ຽມຢາມບັນດາສະຖານທີ່ລົງທຶນໃໝ່ຂອງແຂວງຢູ່ເຂດກະສິກຳທົດລອງປູກພືດ ໄຕນິງ (ໝູ່ບ້ານບິ່ງລອງ, ຕາແສງ ໄທບິ່ງ, ເຈົາແທ່ງ).

ມິງດ້ວງ

ທີ່ມາ: https://baotayninh.vn/xay-dung-chuoi-lien-ket-san-xuat-lua-giong-tren-dia-ban-tinh-a186418.html