ຫວຽດນາມ ຟື້ນຕົວການທ່ອງທ່ຽວໄວທີ່ສຸດຢູ່ອາຊີຕາເວັນອອກສ່ຽງໃຕ້

ປີ 2024, ອັດຕາຟື້ນຕົວເມື່ອທຽບໃສ່ປີ 2019 ຂອງການທ່ອງທ່ຽວ ຫວຽດນາມ ຈະບັນລຸ 98%, ສູງກວ່າບັນດາແຫຼ່ງທ່ອງທ່ຽວທີ່ມີຊື່ສຽງອື່ນໆຄື: ໄທ, ສິງກະໂປ, ອິນໂດເນເຊຍ.

ອີງຕາມຂໍ້ມູນການປັບປຸງຂອງ ກອງເລຂາອາຊຽນ ແລະ ອົງການທ່ອງທ່ຽວແຫ່ງຊາດຊີ້ອອກວ່າ, ຫວຽດນາມ ແມ່ນປະເທດທີ່ມີອັດຕາການຟື້ນຟູການທ່ອງທ່ຽວດີທີ່ສຸດຢູ່ອາຊີຕາເວັນອອກສ່ຽງໃຕ້ໃນປີ 2024. ໃນປີ 2024, ຫວຽດນາມ ຈະຕ້ອນຮັບນັກທ່ອງທ່ຽວສາກົນ 17,6 ລ້ານເທື່ອຄົນ, ອັດຕາການຟື້ນຕົວຂອງຕົນແມ່ນ 98% ເມື່ອທຽບໃສ່ປີ 2019 - ເມື່ອທຽບໃສ່ໄລຍະທີ່ໂລກລະບາດໂຄວິດ-19 ໄດ້ເກີດຂຶ້ນ. ປະເທດອື່ນໆໃນພາກພື້ນມີອັດຕາການຟື້ນຕົວຕໍ່າເຊັ່ນ: ໄທ (88%), ສິງກະໂປ (86%), ແລະຟີລິບປິນ (72%).

ຖ້າຄິດໄລ່ຕົວເລກນັກທ່ອງທ່ຽວຕ່າງປະເທດໃນປີ 2024, ຫວຽດນາມຈະລື່ນກາຍສິງກະໂປ (16,5 ລ້ານຄົນ), ເພີ່ມຂຶ້ນເປັນອັນດັບ 3 ຂອງບັນດາປະເທດທີ່ມີນັກທ່ອງທ່ຽວສາກົນຫຼາຍທີ່ສຸດໃນອາຊີຕາເວັນອອກສຽງໃຕ້ໃນປີ 2024. ອັນດັບໜຶ່ງ ແລະ ອັນດັບ 2 ເປັນຂອງໄທ ມີ 35 ລ້ານຄົນ ແລະ ມາເລເຊຍ ມີ 24,5 ລ້ານຄົນ. ຈຳນວນນັກທ່ອງທ່ຽວສາກົນມາຫວຽດນາມ ແມ່ນສູງກວ່າອິນໂດເນເຊຍ (ເກືອບ 14 ລ້ານເທື່ອຄົນ) ແລະ ຟີລິບປິນ (ເກືອບ 6 ລ້ານຄົນ).

ອີງຕາມສະຖິຕິຈາກ Agoda , ຫວຽດນາມ ແລະ ມາເລເຊຍ ແມ່ນສອງຈຸດໝາຍປາຍທາງອັນດັບໜຶ່ງໃນພາກພື້ນກ່ຽວກັບອັດຕາສ່ວນແຂກທີ່ຈອງການທ່ອງທ່ຽວແບບຍືນຍົງ, ເປັນມິດກັບສິ່ງແວດລ້ອມ. ໃນຈຳນວນ 10 ນະຄອນທີ່ດຶງດູດນັກທ່ອງທ່ຽວປະເພດນີ້, ຫວຽດນາມ ມີ 3 ເມືອງຄື: ນະຄອນ ດ່າໜັງ, ຮ່າຢາງ ແລະ ນະຄອນໂຮ່ຈິມິນ. ການຊອກຫາທີ່ພັກຂອງນັກທ່ອງທ່ຽວສາກົນເພີ່ມຂຶ້ນ 139% ເມື່ອທຽບໃສ່ໄລຍະດຽວກັນຂອງປີກາຍ. ພິເສດແມ່ນນັກທ່ອງທ່ຽວຈາກຈີນເພີ່ມຂຶ້ນເກືອບ 300%.

ພູກວກ ກາຍເປັນຈຸດຫມາຍປາຍທາງທາງເລືອກສູງສຸດສໍາລັບນັກທ່ອງທ່ຽວຕ່າງປະເທດໃນປີ 2025, ດ້ວຍການຊອກຫາທີ່ພັກອາໄສເພີ່ມຂຶ້ນ 266% ເມື່ອທຽບກັບປີ 2024. ຂໍ້ມູນຈາກເວທີດັ່ງກ່າວຍັງໄດ້ບັນທຶກການຂະຫຍາຍຕົວຢ່າງຫຼວງຫຼາຍຈາກນັກທ່ອງທ່ຽວໃນຕະຫຼາດແຫຼ່ງອື່ນໆເຊັ່ນ: ເກົາຫຼີໃຕ້ (ເພີ່ມຂຶ້ນ 94%) ແລະໄຕ້ຫວັນ (ເພີ່ມຂຶ້ນ 123%).

ຫວຽດນາມ ໄດ້ເປີດໃຫ້ນັກທ່ອງທ່ຽວສາກົນເຂົ້າຊົມຢ່າງເປັນທາງການພາຍຫຼັງໂລກລະບາດໃນວັນທີ 15 ມີນາ 2022. ນັບແຕ່ນັ້ນມາ, ອຸດສາຫະກຳການທ່ອງທ່ຽວໄດ້ມີບາດກ້າວຟື້ນຟູຢ່າງຫຼວງຫຼາຍ, ເພີ່ມຂຶ້ນຈາກ 3,7 ລ້ານເທື່ອຄົນໃນປີ 2022 ຂຶ້ນເປັນ 12,6 ລ້ານເທື່ອຄົນໃນປີ 2023; ປີ 2024 ມີ 17,6 ລ້ານເທື່ອຄົນ; ເກືອບເທົ່າກັບ 18 ລ້ານການຢ້ຽມຢາມໃນຍຸກທອງຂອງ 2019.

ໃນປີ 2025, ຂະແໜງທ່ອງທ່ຽວຫວຽດນາມ ຄາດວ່າຈະຕ້ອນຮັບນັກທ່ອງທ່ຽວສາກົນ 22-23 ລ້ານເທື່ອຄົນ. ຕາມບັນດາຜູ້ຊ່ຽວຊານດ້ານການທ່ອງທ່ຽວແລ້ວ, ນີ້ແມ່ນຈຸດໝາຍສູງ, ແຕ່ຍັງສະແດງໃຫ້ເຫັນຄວາມຕັດສິນໃຈເຮັດໃຫ້ການທ່ອງທ່ຽວກາຍເປັນຂະແໜງເສດຖະກິດສຳຄັນຂອງປະເທດ.

ທີ່ມາ