ຫວຽດນາມ - ອົດສະຕາລີ ຊຸກຍູ້ການຮ່ວມມືດ້ານເຕັກໂນໂລຊີດີຈີຕອນ

ຕອນບ່າຍວັນທີ 8/3, ທ່ານລັດຖະມົນຕີກະຊວງຖະແຫຼງຂ່າວ ແລະ ສື່ສານ ຫງວຽນແມ້ງຮຸ່ງ ໄດ້ໃຫ້ການຕ້ອນຮັບຄະນະຜູ້ແທນມະຫາວິທະຍາໄລ Sydney ນຳໂດຍທ່ານສາດສະດາຈານ Willy Zwaenepoel, ຄະນະບໍດີຄະນະວິສະວະກຳສາດ.

ທ່ານລັດຖະມົນຕີ ຫງວຽນແມ້ງຮຸ່ງ ໃຫ້ຮູ້ວ່າ: ໃນຂອບເຂດການຢ້ຽມຢາມ ອົດສະຕາລີ, ທ່ານນາຍົກລັດຖະມົນຕີ Pham Minh Chinh ໄດ້ເນັ້ນໜັກເຖິງການຮ່ວມມືດ້ານການຝຶກອົບຮົມ, ພິເສດແມ່ນໃນຂົງເຂດເຕັກໂນໂລຊີດີຈີຕອນ ແລະ ອຸດສາຫະກຳ semiconductor. ລັດຖະບານໄດ້ມອບໝາຍໃຫ້ກະຊວງຖະແຫລງຂ່າວ ແລະ ສື່ສານ ຮ່າງຍຸດທະສາດແຫ່ງຊາດກ່ຽວກັບ Semiconductors, ໃນນັ້ນມີເນື້ອໃນສຳຄັນແມ່ນການຝຶກອົບຮົມຊັບພະຍາກອນມະນຸດ semiconductor.

ຕອນບ່າຍວັນທີ 8/3, ຢູ່ຮ່າໂນ້ຍ, ທ່ານລັດຖະມົນຕີກະຊວງຖະແຫຼງຂ່າວ ແລະ ສື່ສານ ຫງວຽນແມ້ງຮຸ່ງ ໄດ້ເປັນປະທານໃຫ້ການຕ້ອນຮັບຄະນະຜູ້ແທນອາຈານມະຫາວິທະຍາໄລ Sydney. (ພາບ: Le Anh Dung)

ທ່ານລັດຖະມົນຕີ ຫງວຽນແມ້ງຮຸ່ງ ໃຫ້ຮູ້ວ່າ: ບັນດາຂົງເຂດຄື ເຕັກໂນໂລຊີຂໍ້ມູນຂ່າວສານ ແລະ ເຕັກໂນໂລຢີດີຈີຕອນ ແມ່ນເໝາະສົມທີ່ສຸດສຳລັບຊາວ ຫວຽດນາມ, ເພາະວ່າຊາວຫວຽດນາມ ມີພອນສະຫວັນດ້ານ STEM (ວິທະຍາສາດ - ເຕັກໂນໂລຢີ - ວິສະວະກຳ ແລະ ຄະນິດສາດ). ຍຸດທະສາດ semiconductor ກໍ່ຍົກໃຫ້ຫວຽດນາມກາຍເປັນສູນສະໜອງແຫຼ່ງຊັບພະຍາກອນມະນຸດດ້ານເຕັກໂນໂລຊີຂໍ້ມູນຂ່າວສານທົ່ວໂລກ.

ທ່ານຫົວໜ້າກະຊວງຖະແຫຼງຂ່າວ ແລະ ສື່ສານ ປາດຖະໜາວ່າ ມະຫາວິທະຍາໄລ Sydney ແບ່ງປັນບັນດາຮູບແບບການຮ່ວມມືລະຫວ່າງມະຫາວິທະຍາໄລ - ວິສາຫະກິດໃຫ້ບັນດາມະຫາວິທະຍາໄລຫວຽດນາມ ໄດ້ຮ່ຳຮຽນ.

ອີງຕາມສາດສະດາຈານ Zwaenepoel, ປະສົບການຂອງມະຫາວິທະຍາໄລ Sydney ແມ່ນການສ້າງຂະບວນການຮ່ວມມືໄລຍະຍາວກັບທຸລະກິດ, ໂດຍຜ່ານທຸລະກິດຈະສະຫນັບສະຫນູນນັກຮຽນເພື່ອປັບປຸງຄວາມຮູ້ພາກປະຕິບັດ.

ມະຫາວິທະຍາໄລ Sydney ໄດ້ສົມທົບກັບບັນດາສະຖາບັນຝຶກອົບຮົມຢູ່ ຫວຽດນາມ, ເຂົ້າຮ່ວມການກໍ່ສ້າງຂໍ້ລິເລີ່ມ Sydney - ຫວຽດນາມ. ຍູ້ແຮງການຮ່ວມມືດ້ານການຝຶກອົບຮົມ, ສາມາດເຊີນນັກສຶກສາຫວຽດນາມ ໄປຮ່ຳຮຽນຢູ່ ອົດສະຕາລີ ແລະ ຄຽງຄູ່ກັນນັ້ນ, ຊຸກຍູ້ບັນດາໂຄງການແລກປ່ຽນຝຶກງານ, ຜ່ານນັ້ນເພີ່ມທະວີຄວາມເຂົ້າອົກເຂົ້າໃຈເຊິ່ງກັນ ແລະ ກັນ ເພື່ອແນໃສ່ຊຸກຍູ້ການຮ່ວມມືໃນຕໍ່ໜ້າ.

ທ່ານລັດຖະມົນຕີ ຫງວຽນແມ້ງຮຸ່ງ ສະເໜີໃຫ້ມະຫາວິທະຍາໄລ Sydney ໜູນຊ່ວຍສະຖາບັນເຕັກໂນໂລຢີໄປສະນີ ໂທລະຄົມ ເປີດສຳນັກງານຜູ້ຕາງໜ້າຢູ່ ອົດສະຕາລີ ໃນປີ 2024.

ທີ່ການຕ້ອນຮັບ, ທ່ານສາດສະດາຈານ Zwaenepoel ປາດຖະໜາຢາກມອບນາມມະຍົດ “ສາຂາວິຊາສະເພາະ” ໃຫ້ແກ່ທ່ານລັດຖະມົນຕີ ຫງວຽນແມ້ງຮຸ່ງ - ອະດີດນັກສຶກສາຂອງໂຮງຮຽນ - ສໍາລັບການປະກອບສ່ວນຊຸກຍູ້ການຮ່ວມມືດ້ານການຝຶກອົບຮົມລະຫວ່າງມະຫາວິທະຍາໄລ Sydney ແລະ ຫວຽດນາມ. ມະຫາວິທະຍາໄລຊິດນີແມ່ນບ່ອນທີ່ທ່ານລັດຖະມົນຕີ ຫງວຽນແມ້ງຮຸ່ງ ສຶກສາລະດັບປະລິນຍາໂທສາຂາໂທລະຄົມແຕ່ປີ 1993 – 1995. ທ່ານລັດຖະມົນຕີ ຫງວຽນແມ້ງຮຸ່ງ ໃຫ້ຮູ້ວ່າ: ຈະຊຸກຍູ້ການຮ່ວມມືດ້ານການຝຶກອົບຮົມລະຫວ່າງ ອົດສະຕາລີ ແລະ ຫວຽດນາມ ເວົ້າລວມ ແລະ ນະຄອນ Sydney ແລະ ຫວຽດນາມ ເວົ້າສະເພາະ.

ທີ່ມາ