ຫວຽດນາມ - ອົດສະຕາລີ ເພີ່ມທະວີການຮ່ວມມືໃນຂົງເຂດຫັນເປັນດິຈິຕອນ, ເສດຖະກິດຂຽວ ແລະ ຮັບມືກັບການປ່ຽນແປງຂອງດິນຟ້າອາກາດ

ຕອນເຊົ້າວັນທີ 17 ພະຈິກນີ້, ຢູ່ນະຄອນ San Francisco, ອາເມລິກາ, ເນື່ອງໃນໂອກາດເຂົ້າຮ່ວມກອງປະຊຸມສຸດຍອດ APEC ຄັ້ງທີ 30, ທ່ານປະທານປະເທດ Vo Van Thuong ໄດ້ມີການພົບປະກັບທ່ານນາຍົກລັດຖະມົນຕີ ອົດສະຕາລີ Anthony Albanese.

APEC 2023: Việt Nam-Australia tăng cường hợp tác trong các lĩnh vực chuyển đổi số, kinh tế xanh và ứng phó với biến đổi khí hậu

APEC 2023: ທ່ານປະທານປະເທດ Vo Van Thuong ພົບປະກັບທ່ານນາຍົກລັດຖະມົນຕີ ອົດສະຕາລີ Anthony Albanese.

ການນຳສອງທ່ານໄດ້ຕີລາຄາບັນດາບາດກ້າວພັດທະນາຢ່າງຕັ້ງໜ້າໃນການພົວພັນລະຫວ່າງສອງປະເທດໃນໄລຍະມໍ່ໆມານີ້, ພິເສດແມ່ນພາຍຫຼັງສອງປະເທດກາຍເປັນຄູ່ຮ່ວມມືຍຸດທະສາດໃນປີ 2018, ແລະ ໄດ້ເຫັນດີວ່າ ຄວາມໄວ້ເນື້ອເຊື່ອໃຈມິດຕະພາບລະຫວ່າງປະຊາຊົນສອງປະເທດພ້ອມກັບບັນດາໝາກຜົນທີ່ບັນລຸໄດ້ໃນຂົງເຂດຮ່ວມມືແມ່ນພື້ນຖານສຳຄັນເພື່ອໃຫ້ສອງປະເທດສືບຕໍ່ນຳການພົວພັນລະຫວ່າງສອງປະເທດຂຶ້ນສູ່ລະດັບສູງໃໝ່.

ທ່ານນາຍົກລັດຖະມົນຕີ ອົດສະຕາລີ Anthony Albanese ໄດ້ສະແດງຄວາມຍິນດີທີ່ໄດ້ພົບປະກັບທ່ານປະທານປະເທດ Vo Van Thuong ອີກເທື່ອໜຶ່ງ ແລະ ຂອບໃຈລັດຖະບານ ແລະ ປະຊາຊົນ ຫວຽດນາມ ທີ່ໄດ້ໃຫ້ການຕ້ອນຮັບຢ່າງອົບອຸ່ນຂອງທ່ານໃນການຢ້ຽມຢາມ ຫວຽດນາມ ໃນເດືອນ 6 ຜ່ານມາ.

ທ່ານນາຍົກລັດຖະມົນຕີ Albanese ຢືນຢັນວ່າ ອົດສະຕາລີ ຕີລາຄາສູງການພົວພັນຮ່ວມມືກັບ ຫວຽດນາມ ແລະ ປາດຖະໜາວ່າ ການພົວພັນຈະສືບຕໍ່ພັດທະນາຂຶ້ນສູ່ລະດັບສູງໃໝ່, ແທດເໝາະກັບຄວາມສາມາດບົ່ມຊ້ອນຂອງສອງຝ່າຍ, ພ້ອມທັງໃຫ້ຄຳໝັ້ນສັນຍາວ່າຈະສືບຕໍ່ໃຫ້ບຸລິມະສິດ ODA ແລະ ການຮ່ວມມືກັບ ຫວຽດນາມ ໃນບັນດາຂົງເຂດຫັນເປັນດີຈີຕອນ, ເສດຖະກິດສີຂຽວ ແລະ ຮັບມືກັບການປ່ຽນແປງຂອງດິນຟ້າອາກາດ.

ທ່ານປະທານປະເທດ Vo Van Thuong ຊົມເຊີຍ ອົດສະຕາລີ ກ່ຽວກັບບັນດາຜົນງານດ້ານເສດຖະກິດ - ສັງຄົມໃນໄລຍະຜ່ານມາ ແລະ ຕີລາຄາສູງຕໍ່ຜົນສຳເລັດຂອງການຢ້ຽມຢາມຫວຽດນາມ ຂອງທ່ານຜູ້ອຳນວຍການໃຫຍ່ David Hurley ແລະ ທ່ານນາຍົກລັດຖະມົນຕີ Anthony Albanese ປີນີ້, ເນື່ອງໃນໂອກາດສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດ.

ທ່ານປະທານປະເທດ ຂອບໃຈລັດຖະບານ ອົດສະຕາລີ ຍາມໃດກໍ່ສະໜອງແຫຼ່ງທຶນ ODA ໃຫ້ແກ່ຫວຽດນາມ ຢ່າງໝັ້ນຄົງ, ໃນນັ້ນມີບັນດາໂຄງການກໍ່ສ້າງພື້ນຖານໂຄງລ່າງທີ່ເປັນສັນຍາລັກຢູ່ເຂດທົ່ງພຽງແມ່ນ້ຳຂອງ ແລະ ໜູນຊ່ວຍ ຫວຽດນາມ ປະຕິບັດພາລະກິດຮັກສາສັນຕິພາບຂອງສະຫະປະຊາຊາດ.

ພາບລວມຂອງກອງປະຊຸມ.

ເພື່ອຮັດແໜ້ນການພົວພັນລະຫວ່າງສອງປະເທດໃຫ້ເລິກເຊິ່ງກ່ວາອີກ, ທ່ານປະທານປະເທດ ປາດຖະໜາວ່າ 2 ຝ່າຍຄວນສືບຕໍ່ເພີ່ມທະວີການແລກປ່ຽນຄະນະຜູ້ແທນທຸກຂັ້ນ, ຊຸກຍູ້ບັນດາກົນໄກຮ່ວມມືຢ່າງມີປະສິດທິຜົນ, ເພີ່ມທະວີການຮ່ວມມືໃນບັນດາຂົງເຂດການຄ້າ - ການລົງທຶນ, ປ້ອງກັນຊາດ - ປ້ອງກັນຄວາມສະຫງົບ, ວັດທະນະທຳ, ການທ່ອງທ່ຽວ ແລະ ການແລກປ່ຽນປະຊາຊົນ ໂດຍຜ່ານການເພີ່ມຈຳນວນຖ້ຽວບິນລະຫວ່າງສອງປະເທດ, ສ້າງເງື່ອນໄຂສະດວກໃຫ້ປະຊາຄົມຊາວຫວຽດນາມ ອາໄສຢູ່ ອົດສະຕາລີ ເຊື່ອມໂຍງ ແລະ ສົມທົບກັນຢ່າງແໜ້ນແຟ້ນກ່ວາອີກ.

ການນຳ 2 ທ່ານກໍ່ເຫັນດີສືບຕໍ່ສະໜັບສະໜູນເຊິ່ງກັນ ແລະ ກັນຢູ່ບັນດາເວທີປາໄສພາກພື້ນ ແລະ ສາກົນ ໃນນັ້ນມີສະຫະປະຊາຊາດ, ອາຊຽນ, APEC, ເປັນຕົ້ນໄດ້ແລກປ່ຽນຫຼາຍທັດສະນະ ແລະ ຕີລາຄາກ່ຽວກັບບັນດາບັນຫາພາກພື້ນ ແລະ ສາກົນ, ໃນນັ້ນມີບັນຫາທະເລຕາເວັນອອກ ແລະ ການຮ່ວມມືໃນອະນຸພາກພື້ນແມ່ນ້ຳຂອງ.

ທີ່ມາ