ຈີນ​ແລະ​ຟີ​ລິບ​ປິນ​ຜ່ອນ​ຄວາມ​ເຄັ່ງ​ຕຶງ​ຈະ​ສົ່ງ​ຜົນ​ດີ​ຕໍ່​ການ​ເຈ​ລະ​ຈາ COC ຢູ່​ທະ​ເລ​ຕາ​ເວັນ​ອອກ

ທ່ານ​ເລຂາທິການ​ໃຫຍ່ ອາ​ຊຽນ ​ໄດ້​ປະກອບ​ຄຳ​ເຫັນ ​ແລະ ຕີ​ລາຄາ​ບັນດາ​ບັນຫາ​ສຳຄັນ​ຂອງ​ພາກ​ພື້ນ​ຄື: ສະພາບ​ການ​ຢູ່​ທະ​ເລ​ຕາ​ເວັນ​ອອກ ​ແລະ ມຽນມາ.

ທ່ານ​ເລຂາທິການ​ໃຫຍ່​ອາ​ຊຽນ Kao Kim Hourn ຖື​ວ່າ, ຍັງ​ຄົງ​ຕ້ອງ​ຕິດຕາມ​ການ​ພັດທະນາ​ຢູ່​ທະ​ເລ​ຕາ​ເວັນ​ອອກ​ຢ່າງ​ໃກ້ຊິດ. (ພາບ: DQ)

ກປ.ອອນໄລ - ຕອນບ່າຍວັນທີ 30 ກໍລະກົດ, ທີ່ສໍານັກງານໃຫຍ່ເລຂາທິການອາຊຽນ ຢູ່ນະຄອນຫຼວງຈາກາຕາ, ປະເທດອິນໂດເນເຊຍ, ທ່ານ Kao Kim Hourn, ເລຂາທິການໃຫຍ່ອາຊຽນ ໄດ້ປະກາດໝາກຜົນພົ້ນເດັ່ນຂອງກອງປະຊຸມລັດຖະມົນຕີການຕ່າງປະເທດອາຊຽນ ຄັ້ງທີ 57 (AMM-57) ແລະ ບັນດາກອງປະຊຸມທີ່ກ່ຽວຂ້ອງ.

ນອກ​ນີ້, ທ່ານ​ເລຂາທິການ​ໃຫຍ່​ອາ​ຊຽນ​ໄດ້​ໃຫ້​ຄຳ​ເຫັນ ​ແລະ ຕີ​ລາຄາ​ກ່ຽວ​ກັບ​ບາງ​ບັນຫາ​ທີ່​ພົ້ນ​ເດັ່ນ​ໃນ​ພາກ​ພື້ນ​ຄື: ສະພາບ​ການ​ຢູ່​ທະ​ເລ​ຕາ​ເວັນ​ອອກ ​ແລະ ມຽນມາ.

ທ່ານ​ເລຂາທິການ​ໃຫຍ່ Kao Kim Hourn ​ໃຫ້​ຮູ້​ວ່າ: ຫວ່າງ​ມໍ່ໆ​ມາ​ນີ້, ຄວາມ​ເຄັ່ງ​ຕຶງ​ລະຫວ່າງ ຟີ​ລິບ​ປິນ - ຈີນ ຢູ່​ທະ​ເລ​ຕາ​ເວັນ​ອອກ ​ໄດ້​ສົ່ງ​ຜົນ​ສະທ້ອນ​ເຖິງ​ຂະ​ບວນການ​ເຈລະຈາ​ລະຫວ່າງ ຈີນ ​ແລະ ອາ​ຊຽນ ​ເພື່ອ​ແນ​ໃສ່​ສຳ​ເລັດ​ປະມວນ​ຂໍ້​ກຳນົດ​ການ​ປະພຶດ​ຢູ່​ທະ​ເລ​ຕາ​ເວັນ​ອອກ (COC).

​ເຖິງ​ຢ່າງ​ໃດ​ກໍ່ຕາມ, ທ່ານ​ເລຂາທິການ​ໃຫຍ່​ອາ​ຊຽນ ຢືນຢັນ​ວ່າ: “ຂ້າພະ​ເຈົ້າ​ເຊື່ອ​ໝັ້ນ​ວ່າ ຟີ​ລິບ​ປິນ ​ແລະ ຈີນ ພວມ​ສົມທົບ​ກັນ​ເພື່ອ​ຫລຸດຜ່ອນ​ຄວາມ​ເຄັ່ງ​ຕຶງ, ຫວັງ​ວ່າ​ຈະ​ມີ​ຜົນ​ດີ​ຕໍ່​ຂະ​ບວນການ​ເຈລະຈາ COC ​ໃນ​ປະຈຸ​ບັນ. ບັນດາ​ປະ​ເທດ​ອາ​ຊຽນກໍ່​ເຫັນ​ດີ​ແກ້​ໄຂ​ບັນຫາ​ທີ່​ຍັງ​ຄົງ​ຄ້າງ​ຈຳນວນ​ໜຶ່ງ​ເພື່ອ​ເລັ່ງລັດ​ຂະ​ບວນການ​ເຈລະຈາ. ດ້ວຍ​ຄຳ​ໝັ້ນ​ສັນຍາ​ຂອງ​ຟີ​ລິບ​ປິນ ​ແລະ ຈີນ ​ເພື່ອ​ຫລຸດຜ່ອນ​ຄວາມ​ເຄັ່ງ​ຕຶງ, ຂ້າພະ​ເຈົ້າ​ຄິດ​ວ່າ​ນັ້ນ​ແມ່ນ​ການ​ພັດທະນາ​ໃນ​ແງ່​ດີ, ​ແຕ່​ຄວນ​ສືບ​ຕໍ່​ຕິດຕາມ​ກວດກາ​ບັນດາ​ການ​ພັດທະນາ​ໃນ​ໄລຍະ​ຈະ​ມາ​ເຖິງ.”

ກ່ຽວ​ກັບ​ສະພາບ​ການ​ຢູ່​ມຽນມາ, ທ່ານ​ເລຂາທິການ​ໃຫຍ່​ອາ​ຊຽນ Kao Kim Hourn ​ໃຫ້​ຮູ້​ວ່າ: “ມີ​ຄວາມ​ຄືບ​ໜ້າ​ບາງ​ຢ່າງ, ພິ​ເສດ​ແມ່ນ​ໃນ​ຂົງ​ເຂດ​ການ​ຊ່ວຍ​ເຫຼືອ​ດ້ານ​ມະນຸດສະທຳ​ໃຫ້​ແກ່​ປະຊາຊົນ​ມຽນມາ. ອາ​ຊຽນ​ຍາມ​ໃດ​ກໍ່​ເຮັດ​ຈົນ​ສຸດ​ຄວາມ​ສາມາດ, ຮ່ວມ​ມື​ກັບ​ມຽນມາ ​ແລະ ບັນດາ​ຝ່າຍ​ທີ່​ກ່ຽວຂ້ອງ​ເພື່ອ​ແກ້​ໄຂ​ບັນຫາ, ພ້ອມ​ທັງ​ຄາດ​ວ່າ​ມຽນມາ​ຈະ​ໃຫ້​ຄຳ​ໝັ້ນ​ສັນຍາ​ປະຕິບັດ​ຄຳ​ໝັ້ນ​ສັນຍາ 5 ຂໍ້. ​ແຜນການ​ທີ່​ເປັນ​ເອກະສັນ​ກັນ 5 ​ປະ​ເທດ​ຍັງ​ແມ່ນ​ແຜນການ​ທີ່​ອາ​ຊຽນ​ໃຫ້​ຄຳ​ໝັ້ນ​ສັນຍາ​ປະຕິບັດ ​ແລະ ຫວັງ​ໃຫ້​ບັນດາ​ຄູ່​ຮ່ວມ​ມື​ສະໜັບສະໜູນ​ແຜນການ​ນີ້.”

ທີ່ການປະຊຸມຂ່າວ, ທ່ານເລຂາທິການໃຫຍ່ ອາຊຽນ ຍັງໄດ້ທົບທວນຄືນບັນດາໝາກຜົນທີ່ບັນລຸໄດ້ໃນກອງປະຊຸມ AMM-57 ແລະ ບັນດາກອງປະຊຸມທີ່ກ່ຽວຂ້ອງທີ່ຈັດຂຶ້ນຢູ່ ສປປ ລາວ, ດ້ວຍການຕີລາຄາຄວາມຄືບໜ້າການຈັດຕັ້ງປະຕິບັດບັນດາບຸລິມະສິດຂອງອາຊຽນ ໃນປີ 2024 ກໍ່ຄືຂະບວນການສ້າງປະຊາຄົມອາຊຽນ; ພ້ອມ​ກັນ​ນັ້ນ, ​ໄດ້​ຮັບ​ການ​ຮັບຮອງ​ເອົາ​ເອກະສານ​ສຳຄັນ​ຫຼາຍ​ສະບັບ, ​ເພື່ອ​ເປັນ​ພື້ນຖານ​ໃນ​ການ​ປະຕິບັດ​ການ​ຮ່ວມ​ມື​ພາຍ​ໃນ​ກຸ່ມ ​ແລະ ລະຫວ່າງ ອາ​ຊຽນ ​ແລະ ບັນດາ​ຄູ່​ຮ່ວມ​ມື​ໃນ​ໄລຍະ​ຈະ​ມາ​ເຖິງ.

ທີ່ມາ: https://baoquocte.vn/tong-thu-ky-asean-trung-quoc-va-philippines-ha-nhiet-cang-thang-se-tac-dong-tich-cuc-den-dam-phan-coc-o-bien-dong-281073.html