ທ່ານເລຂາທິການໃຫຍ່ To Lam ໄດ້ໃຫ້ການຕ້ອນຮັບທ່ານນາຍົກລັດຖະມົນຕີ ລັດເຊຍ Mikhail Mishustin

ຕອນບ່າຍວັນທີ 14/1, ຢູ່ສຳນັກງານສູນກາງພັກ, ທ່ານເລຂາທິການໃຫຍ່ To Lam ໄດ້ໃຫ້ການຕ້ອນຮັບທ່ານນາຍົກລັດຖະມົນຕີ ສະຫະພັນລັດເຊຍ Mikhail Mishustin ທີ່ພວມມາຢ້ຽມຢາມ ຫວຽດນາມ ຢ່າງເປັນທາງການ.

ທ່ານເລຂາທິການໃຫຍ່ To Lam ໄດ້ໃຫ້ການຕ້ອນຮັບທ່ານນາຍົກລັດຖະມົນຕີສະຫະພັນລັດເຊຍ Mikhail Vladimirovich Mishustin. (ພາບ: DANG KHOA)

ທ່ານເລຂາທິການໃຫຍ່ To Lam ໄດ້ຕີລາຄາສູງຄວາມໝາຍຂອງການຢ້ຽມຢາມ ແລະ ຊົມເຊີຍໝາກຜົນແຫ່ງການເຈລະຈາ ແລະ ການພົບປະກັບການນຳຂັ້ນສູງ ຫວຽດນາມ; ການຢ້ຽມຢາມມີຄວາມໝາຍສຳຄັນທີ່ສຸດ, ໄດ້ດຳເນີນໃນໂອກາດສະເຫຼີມສະຫຼອງ 75 ປີແຫ່ງວັນສ້າງຕັ້ງການພົວພັນທາງການທູດລະຫວ່າງ 2 ປະເທດ ແລະ ແມ່ນການຢ້ຽມຢາມຫວຽດນາມ ຄັ້ງທຳອິດຂອງທ່ານ Mishustin ໃນຖານະເປັນນາຍົກລັດຖະມົນຕີ ລັດເຊຍ.

ທ່ານເລຂາທິການໃຫຍ່ To Lam ໄດ້ສະແດງຄວາມດີໃຈຕໍ່ບັນດາໝາກຜົນແຫ່ງການຮ່ວມມືລະຫວ່າງ 2 ປະເທດບັນລຸໄດ້ໃນໄລຍະມໍ່ໆມານີ້, ພິເສດແມ່ນພາຍຫຼັງການຢ້ຽມຢາມທາງລັດຖະກິດຢູ່ ຫວຽດນາມ ຂອງທ່ານປະທານາທິບໍດີລັດເຊຍ V. Putin ໃນເດືອນ 6/2024; ຖືວ່າ, ການຢ້ຽມຢາມຄັ້ງນີ້ຂອງທ່ານນາຍົກລັດຖະມົນຕີ Mikhail Mishustin ແມ່ນເພື່ອສືບຕໍ່ຮັບຮູ້ບັນດາເນື້ອໃນການຮ່ວມມືທີ່ສອງຝ່າຍບັນລຸໄດ້ ແລະ ວາງອອກບັນດາທິດທາງຕົ້ນຕໍເພື່ອຊຸກຍູ້ການພົວພັນສອງຝ່າຍ.

ທ່ານເລຂາທິການໃຫຍ່ To Lam ໄດ້ຝາກຄວາມອວຍພອນອັນອົບອຸ່ນ ແລະ ອວຍພອນປີໃໝ່ມາຍັງທ່ານປະທານາທິບໍດີລັດເຊຍ V. Putin, ປະທານພັກສະຫະປະຊາຊາດ ລັດເຊຍ, ຮອງປະທານສະພາຄວາມໝັ້ນຄົງສະຫະພັນລັດເຊຍ D. Medvedev ແລະ ບັນດາການນຳລັດເຊຍ.

ທ່ານເລຂາທິການໃຫຍ່ To Lam ຢືນຢັນວ່າ: ຫວຽດນາມ ຍາມໃດກໍ່ຈົດຈຳບັນດາການໜູນຊ່ວຍ ແລະ ການຊ່ວຍເຫຼືອອັນລ້ຳຄ່າ ແລະ ສຸດຈິດສຸດໃຈທີ່ປະຊາຊົນ ໂຊວຽດ ແລະ ລັດເຊຍ ມອບໃຫ້ຫວຽດນາມ ໃນໄລຍະປະສົບກັບຄວາມຫຍຸ້ງຍາກ, ໃນພາລະກິດສ້າງສາ ແລະ ປ້ອງກັນປະເທດ; ຢືນຢັນວ່າ ຫວຽດນາມ ໂດຍສະເພາະແມ່ນຕີລາຄາສູງການພົວພັນແບບດັ້ງເດີມ ແລະ ການພົວພັນຄູ່ຮ່ວມມືຍຸດທະສາດຮອບດ້ານກັບ ລັດເຊຍ, ຍາມໃດກໍ່ຖືລັດເຊຍ ແມ່ນຄູ່ຮ່ວມມືສຳຄັນແຖວໜ້າໃນນະໂຍບາຍການຕ່າງປະເທດຂອງຫວຽດນາມ.

ທ່ານເລຂາທິການໃຫຍ່ To Lam ໄດ້ຕີລາຄາສູງບັນດາທິດທາງໃຫຍ່ເພື່ອເພີ່ມທະວີການພົວພັນຮ່ວມມືລະຫວ່າງ ຫວຽດນາມ - ລັດເຊຍ ໃນໄລຍະຈະມາເຖິງ.

ສະແດງຄວາມປິຕິຊົມຊື່ນໃນການຢ້ຽມຢາມ ຫວຽດນາມ ຄັ້ງທໍາອິດ, ທ່ານນາຍົກລັດຖະມົນຕີ Mikhail Mishustin ໄດ້ຂອບໃຈຢ່າງຈິງໃຈ ທ່ານເລຂາທິການໃຫຍ່ To Lam ທີ່ໄດ້ສະຫລະເວລາມາຕ້ອນຮັບຄະນະຜູ້ແທນ; ໄດ້ສົ່ງຄຳອວຍພອນອັນສະໜິດສະໜົມຂອງທ່ານປະທານາທິບໍດີລັດເຊຍ V. Putin ແລະ ບັນດາການນຳຂັ້ນສູງຂອງສະຫະພັນລັດເຊຍ ເຖິງທ່ານເລຂາທິການໃຫຍ່ To Lam ແລະ ເຄົາລົບຄຳເຊື້ອເຊີນຂອງທ່ານປະທານາທິບໍດີລັດເຊຍ ເຖິງທ່ານເລຂາທິການໃຫຍ່ To Lam ເພື່ອເຂົ້າຮ່ວມພິທີສະເຫຼີມສະຫຼອງ 80 ປີແຫ່ງວັນໄຊຊະນະສົງຄາມຮັກຊາດຄັ້ງໃຫຍ່ ແລະ ການຢ້ຽມຢາມ 2 ຝ່າຍຢູ່ສະຫະພັນລັດເຊຍ ໃນປີ 2025.

ທ່ານນາຍົກລັດຖະມົນຕີ Mishustin ຊົມເຊີຍ ຫວຽດນາມ ຕໍ່ກັບບັນດາຜົນງານທີ່ບັນລຸໄດ້ໃນດ້ານເສດຖະກິດ - ສັງຄົມໃນໄລຍະຜ່ານມາ ແລະ ເຊື່ອໝັ້ນວ່າ ພາຍໃຕ້ການນຳພາຂອງພັກກອມມູນິດ ຫວຽດນາມ ໂດຍທ່ານເລຂາທິການໃຫຍ່ ຫງວຽນຟູ໋ຈ້ອງ ນຳໜ້າ, ຫວຽດນາມ ຈະສືບຕໍ່ຍາດໄດ້ຜົນສຳເລັດຫຼາຍຢ່າງເພື່ອນຳປະເທດຊາດ ຫວຽດນາມ ກ້າວເຂົ້າສູ່ໄລຍະໃໝ່ຢ່າງເຂັ້ມແຂງ, ວັດທະນາຖາວອນ.

ແຈ້ງໃຫ້ທ່ານເລຂາທິການໃຫຍ່ກ່ຽວກັບໝາກຜົນການພົບປະເຈລະຈາກັບທ່ານນາຍົກລັດຖະມົນຕີ ຟ້າມບິ່ງມິງ, ທ່ານນາຍົກລັດຖະມົນຕີ Mikhail Mishustin ຢືນຢັນວ່າ, ຝ່າຍ ລັດເຊຍ ຕີລາຄາສູງບັນດາຄວາມມານະພະຍາຍາມຂອງຝ່າຍຫວຽດນາມ ໃນການແກ້ໄຂຄວາມຫຍຸ້ງຍາກ, ຊຸກຍູ້ການຮ່ວມມືສອງຝ່າຍໃນໄລຍະມໍ່ໆມານີ້, ຊ່ວຍໃຫ້ການພົວພັນ 2 ປະເທດບັນລຸໄດ້ບັນດາຜົນງານດີເດັ່ນໃນທຸກຂົງເຂດ.

ທ່ານນາຍົກລັດຖະມົນຕີ Mikhail Mishustin ແບ່ງປັນວ່າ, ໃນສະພາບການທີ່ມີການປ່ຽນແປງຫຼາຍຢ່າງ ແລະ ມີການຜັນແປຢ່າງສັບສົນໃນໂລກ ແລະ ພາກພື້ນ, ລັດເຊຍ ຍາມໃດກໍ່ຕີລາຄາສູງນ້ຳໃຈມິດຕະພາບ, ຄວາມຈົງຮັກພັກດີຂອງປະຊາຊົນຫວຽດນາມ ຕໍ່ລັດເຊຍ; ຢືນຢັນວ່າໃນນະໂຍບາຍການຕ່າງປະເທດ, ລັດເຊຍ ຍາມໃດກໍ່ຖື ຫວຽດນາມ ແມ່ນໜຶ່ງໃນບັນດາຄູ່ຮ່ວມມືບຸລິມະສິດສຳຄັນໃນພາກພື້ນ ອາຊີ - ປາຊີຟິກ, ພິເສດແມ່ນພາກພື້ນອາຊີຕາເວັນອອກສ່ຽງໃຕ້, ພ້ອມແລ້ວທີ່ຈະເປີດກວ້າງການພົວພັນຄູ່ຮ່ວມມືຍຸດທະສາດຮອບດ້ານໃນທຸກຂົງເຂດເສດຖະກິດ, ການຄ້າ, ພະລັງງານ, ປ້ອງກັນຄວາມສະຫງົບ, ວິທະຍາສາດ ແລະ ເຕັກໂນໂລຢີ, ວັດທະນະທຳ, ການສຶກສາ ແລະ ການແລກປ່ຽນປະຊາຊົນ.

ໃນບັນຍາກາດທີ່ເປີດເຜີຍ ແລະ ເປັນມິດ, ທ່ານເລຂາທິການໃຫຍ່ To Lam ແລະ ທ່ານນາຍົກລັດຖະມົນຕີ ສະຫະພັນລັດເຊຍ Mishustin ໄດ້ແບ່ງປັນບາງຈຸດສຳຄັນຂອງສະພາບການຢູ່ແຕ່ລະປະເທດ; ໄດ້ເຫັນດີເປັນເອກະສັນກ່ຽວກັບຫຼາຍທິດທາງໃຫຍ່ເພື່ອຮັດແໜ້ນສາຍພົວພັນມິດຕະພາບທີ່ເປັນມູນເຊື້ອ ແລະ ການພົວພັນຄູ່ຮ່ວມມືຍຸດທະສາດຮອບດ້ານຫວຽດນາມ - ສະຫະພັນລັດເຊຍ ໃຫ້ເລິກເຊິ່ງກ່ວາອີກ.

ທີ່ມາ