ທ່ານນາຍົກລັດຖະມົນຕີ ຟ້າມບິ່ງມິງ ໄດ້ມີການເຈລະຈາກັບນາຍົກລັດຖະມົນຕີ ລັດເຊຍ

(vovworld)- ຕອນບ່າຍວັນທີ 14/1, ຢູ່ສຳນັກງານລັດຖະບານ, ທ່ານນາຍົກລັດຖະມົນຕີ ຟ້າມບິ່ງມິງ ໄດ້ເປັນປະທານການເຈລະຈາກັບທ່ານນາຍົກລັດຖະມົນຕີ ລັດເຊຍ Mikhail Mishustin.

ເຂົ້າຮ່ວມການເຈລະຈາມີທ່ານຮອງນາຍົກລັດຖະມົນຕີ ບຸ່ຍແທງເຊີນ, ທ່ານຮອງນາຍົກລັດຖະມົນຕີ ເຈີ່ນດ້າຍກວາງ, ລັດຖະມົນຕີ, ຫົວໜ້າຫ້ອງວ່າການລັດຖະບານ ເຈີ່ນວັນເຊີນ, ລັດຖະມົນຕີກະຊວງອຸດສາຫະກຳການຄ້າ, ແຜນການ ແລະ ການລົງທຶນ, ການເງິນ, ວັດທະນະທຳ, ກິລາ ແລະ ທ່ອງທ່ຽວ, ຖະແຫຼງຂ່າວ ແລະ ສື່ສານ, ທ່ານເອກອັກຄະລັດຖະທູດ ຫວຽດນາມ ປະຈຳ ລັດເຊຍ Dang Minh Khoi ແລະ ການນຳຫຼາຍກະຊວງ, ຂະແໜງການອື່ນໆ.

Thủ tướng Phạm Minh Chính hội đàm với Thủ tướng Nga- Ảnh 1. — ທ່ານນາຍົກລັດຖະມົນຕີ Pham Minh Chinh ເປັນປະທານການເຈລະຈາກັບທ່ານນາຍົກລັດຖະມົນຕີລັດເຊຍ Mikhail Mishustin. ພາບ: ຮືຮົ່ງ

ສ່ວນຝ່າຍລັດເຊຍ, ມີທ່ານຮອງນາຍົກລັດຖະມົນຕີ Aleksei Overchuk, ຮອງນາຍົກລັດຖະມົນຕີ Dmitry Chernyshenko, ລັດຖະມົນຕີກະຊວງອຸດສາຫະກຳ ແລະການຄ້າ, ວັດທະນະທຳ, ພັດທະນາເສດຖະກິດ, ການເງິນ, ການພັດທະນາດິຈິຕອລ, ຂໍ້ມູນຂ່າວສານ ແລະ ສື່ສານ ແລະ ສື່ສານມວນຊົນ ແລະ ອື່ນໆ, ທ່ານເອກອັກຄະລັດຖະທູດ ລັດເຊຍ ປະຈຳ ຫວຽດນາມ Gennady Bezdetko, ພ້ອມດ້ວຍພະນັກງານຂັ້ນສູງ ແລະ ການນຳບັນດາວິສາຫະກິດໃຫຍ່ລັດເຊຍ ເຂົ້າຮ່ວມ.

ເລີ່ມປີຄົບຮອບ

ທ່ານນາຍົກລັດຖະມົນຕີ ຟ້າມບິ່ງມິງ ຊົມເຊີຍທ່ານນາຍົກລັດຖະມົນຕີ Mikhail Mishustin ທີ່ມາຢ້ຽມຢາມ ຫວຽດນາມ ຢ່າງເປັນທາງການຄັ້ງທຳອິດ, ເນື່ອງໃນໂອກາດສະເຫຼີມສະຫຼອງ 75 ປີແຫ່ງວັນສ້າງຕັ້ງການພົວພັນທາງການທູດລະຫວ່າງ 2 ປະເທດ ແລະ ເຊື່ອໝັ້ນວ່າ ຈະສ້າງກຳລັງແຮງຊຸກຍູ້ການພົວພັນຄູ່ຮ່ວມມືຮອບດ້ານ ຫວຽດນາມ - ລັດເຊຍ ໃຫ້ເລິກເຊິ່ງກວ່າອີກ.

ທ່ານນາຍົກລັດຖະມົນຕີ Mikhail Mishutin ສະແດງຄວາມປິຕິຊົມຊື່ນເມື່ອມາຢ້ຽມຢາມ ຫວຽດນາມ, ເນັ້ນໜັກວ່າ ການຢ້ຽມຢາມແມ່ນໂອກາດສຳຄັນເພື່ອໃຫ້ລັດຖະບານ 2 ປະເທດກວດກາຄືນບັນດາຂໍ້ຕົກລົງລະຫວ່າງການນຳຂັ້ນສູງ 2 ປະເທດບັນລຸໄດ້ໃນໄລຍະມໍ່ໆມານີ້ ແລະ ປະຕິບັດບັນດາໜ້າທີ່ສະເພາະເພື່ອພັດທະນາການພົວພັນຮ່ວມມືສອງຝ່າຍຢ່າງມີປະສິດທິຜົນ ແລະ ແທດຈິງໃນໄລຍະຈະມາເຖິງ.

ນາຍົກລັດຖະມົນຕີ 2 ທ່ານໄດ້ແຈ້ງໃຫ້ກັນຊາບກ່ຽວກັບສະພາບການການເມືອງ, ເສດຖະກິດ ແລະ ສັງຄົມຂອງແຕ່ລະປະເທດ; ພ້ອມກັນທົບທວນຄືນບັນດາໝາກຜົນທີ່ບັນລຸໄດ້ໃນການຮ່ວມມືລະຫວ່າງສອງປະເທດ, ໄດ້ແລກປ່ຽນຄວາມເຫັນຢ່າງເລິກເຊິ່ງກ່ຽວກັບສະພາບການປະຈຸບັນ, ແງ່ຫວັງ ແລະ ໄດ້ເຫັນດີເປັນເອກະສັນກ່ຽວກັບທິດທາງຊຸກຍູ້ການຮ່ວມມືຮອບດ້ານລະຫວ່າງສອງປະເທດ. 2 ຝ່າຍກໍ່ໄດ້ປຶກສາຫາລືບັນດາບັນຫາສາກົນ ແລະ ພາກພື້ນທີ່ຕ່າງຝ່າຍຕ່າງມີຄວາມສົນໃຈ.

Thủ tướng Phạm Minh Chính hội đàm với Thủ tướng Nga- Ảnh 2. — ທ່ານນາຍົກລັດຖະມົນຕີ Pham Minh Chinh ກ່າວຄຳເຫັນທີ່ການເຈລະຈາກັບທ່ານນາຍົກລັດຖະມົນຕີ ລັດເຊຍ Mikhail Mishustin. ພາບ: ຮືຮົ່ງ

ທ່ານນາຍົກລັດຖະມົນຕີ ລັດເຊຍ ສະແດງຄວາມປະທັບໃຈຕໍ່ບັນດາຜົນງານພັດທະນາເສດຖະກິດ - ສັງຄົມ ທີ່ ຫວຽດນາມ ບັນລຸໄດ້ໃນໄລຍະມໍ່ໆມານີ້, ປະກອບສ່ວນສຳຄັນເຂົ້າໃນການປັບປຸງຊີວິດການເປັນຢູ່ຂອງປະຊາຊົນ, ຖານະບົດບາດ ແລະ ກຽດສັກສີຂອງປະເທດໃນພາກພື້ນ ແລະ ສາກົນ; ຢືນຢັນຄວາມສຳຄັນຂອງການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງ 2 ປະເທດ, ເນັ້ນໜັກວ່າ ລັດເຊຍ ຖື ຫວຽດນາມ ແມ່ນຄູ່ຮ່ວມມືຍຸດທະສາດແຖວໜ້າຢູ່ອາຊີຕາເວັນອອກສ່ຽງໃຕ້, ປາດຖະໜາຢາກຍົກສູງປະສິດທິຜົນຂອງການຮ່ວມມືທີ່ຕ່າງຝ່າຍຕ່າງມີຜົນປະໂຫຍດກັບ ຫວຽດນາມ ໃນທຸກຂົງເຂດທີ່ທັງສອງຝ່າຍມີທ່າແຮງ ແລະ ເຂັ້ມແຂງ.

ທ່ານນາຍົກລັດຖະມົນຕີ ຫວຽດນາມ ຊົມເຊີຍ ລັດເຊຍ ກ່ຽວກັບບັນດາຜົນງານພັດທະນາເສດຖະກິດ - ສັງຄົມ; ຢືນຢັນວ່າ ຫວຽດນາມ ຍາມໃດກໍ່ປະຕິບັດນະໂຍບາຍການຕ່າງປະເທດເອກະລາດ, ເປັນເຈົ້າຕົນເອງ, ມີຄວາມຫຼາກຫຼາຍ, ຫັນເປັນຫຼາຍຝ່າຍ, ຍາມໃດກໍ່ຖືການພົວພັນມິດຕະພາບທີ່ເປັນມູນເຊື້ອ ແລະ ການພົວພັນຄູ່ຮ່ວມມືຍຸດທະສາດຮອບດ້ານກັບ ລັດເຊຍ ແມ່ນໜຶ່ງໃນບັນດາບຸລິມະສິດອັນດັບໜຶ່ງ; ປາດຖະໜາຢາກຮ່ວມມືກັບ ລັດເຊຍ ເພື່ອຊຸກຍູ້ຄວາມໝັ້ນຄົງ, ການຮ່ວມມື ແລະ ພັດທະນາຢູ່ພາກພື້ນ ແລະ ໃນໂລກ.

ສອງຝ່າຍເຫັນດີສືບຕໍ່ເພີ່ມທະວີການເຈລະຈາ, ຮັດແໜ້ນຄວາມໄວ້ເນື້ອເຊື່ອໃຈທາງດ້ານການເມືອງ, ຊຸກຍູ້ການຕິດຕໍ່ພົວພັນ ແລະ ແລກປ່ຽນຄະນະຜູ້ແທນທຸກຂັ້ນ ແລະ ທຸກຊ່ອງທາງ, ສ້າງພື້ນຖານການພັດທະນາຮອບດ້ານຂອງການຮ່ວມມືສອງຝ່າຍ, ພິເສດແມ່ນໃນຂົງເຂດເສດຖະກິດ - ການຄ້າ, ການລົງທຶນ, ພະລັງງານ - ນ້ຳມັນ ແລະ ອາຍແກັສ, ການສຶກສາ - ບຳລຸງສ້າງ, ວັດທະນະທຳ, ທ່ອງທ່ຽວ, ວິທະຍາສາດ - ເຕັກໂນໂລຊີ ແລະ ການຮ່ວມມືທ້ອງຖິ່ນ...

ການຄ້າຕ້ອງການວິທີແກ້ໄຂທີ່ກ້າວ ໜ້າ

2 ຝ່າຍໃຫ້ຂໍ້ສັງເກດວ່າ, ວົງເງິນການຄ້າສອງຝ່າຍບັນລຸໄດ້ການເຕີບໂຕຢ່າງຕັ້ງໜ້າໃນໄລຍະມໍ່ໆມານີ້, ແຕ່ຍັງມີຊ່ອງຫວ່າງຫຼາຍຢ່າງເພື່ອຂຸດຄົ້ນ; ເຫັນດີເປັນເອກະພາບວ່າ ຄວນມີບັນດາມາດຕະການແກ້ໄຂເພື່ອເພີ່ມທະວີມູນຄ່າການຄ້າ 2 ຝ່າຍ, ໃນນັ້ນມີການນຳໃຊ້ສັນຍາການຄ້າເສລີລະຫວ່າງ ຫວຽດນາມ ແລະ ສະຫະພັນເສດຖະກິດເອີລົບ, ໃນນັ້ນ ລັດເຊຍ ເປັນສະມາຊິກ; ສືບຕໍ່ຄົ້ນຄ້ວາ ແລະ ສ້າງເງື່ອນໄຂເປີດກ້ວາງບັນດາສິນຄ້າຂອງກັນຄື ຜະລິດຕະພັນກະເສດ, ຢາ...

Thủ tướng Phạm Minh Chính hội đàm với Thủ tướng Nga- Ảnh 4. — ຄະນະຜູ້ແທນ ລັດເຊຍ ທີ່ການເຈລະຈາ. ພາບ: ຮືຮົ່ງ

ທ່ານນາຍົກລັດຖະມົນຕີ 2 ທ່ານ ຢືນຢັນບົດບາດສຳຄັນຂອງກົນໄກຮ່ວມມືລະຫວ່າງຄະນະລັດຖະບານ ຫວຽດນາມ - ລັດເຊຍ, ຮັບຮູ້ບັນດາການປະກອບສ່ວນອັນດີຂອງກະຊວງ, ຂະແໜງການຂອງສອງປະເທດ, ສະເໜີໃຫ້ຄະນະ, ກະຊວງ, ຂະແໜງການ ສືບຕໍ່ສະເໜີບັນດາມາດຕະການຊຸກຍູ້ການຮ່ວມມືສອງຝ່າຍ, ນຳໜ້າໃນການປະຕິບັດບັນດາຂໍ້ຕົກລົງ, ໃນນັ້ນມີບັນດາກອງປະຊຸມຄົບຄະນະຄັ້ງທີ 25.

ກໍ່ສ້າງສູນຄົ້ນຄວ້າວິທະຍາສາດ ແລະ ເຕັກໂນໂລຊີນິວເຄຼຍ

ນາຍົກລັດຖະມົນຕີ 2 ທ່ານ ຢືນຢັນຄວາມສຳຄັນຂອງການຮ່ວມມືດ້ານວິທະຍາສາດ ແລະ ເຕັກໂນໂລຢີ; ປາດຖະໜາຢາກສືບຕໍ່ຮ່ວມມືປະຕິບັດການກໍ່ສ້າງສູນຄົ້ນຄວ້າວິທະຍາສາດ ແລະ ເຕັກໂນໂລຢີນິວເຄຼຍ ຫວຽດນາມ. ທ່ານນາຍົກລັດຖະມົນຕີ Mikhail Mishustin ຕີລາຄາສູງໝາກຜົນແຫ່ງການຮ່ວມມືຄົ້ນຄວ້າວິທະຍາສາດໃນໄລຍະມໍ່ໆມານີ້, ຢືນຢັນວ່າ ລັດເຊຍ ຮ່ວມມືກັບຫຼາຍປະເທດພັດທະນາພະລັງງານນິວເຄຼຍ ແລະ ພ້ອມແລ້ວທີ່ຈະເຂົ້າຮ່ວມການກໍ່ສ້າງຂະແໜງໄຟຟ້ານິວເຄຼຍຂອງ ຫວຽດນາມ; ສະເໜີຊຸກຍູ້ການຮ່ວມມືໃນຂົງເຂດສາທາລະນະສຸກ, ແຮງງານ, ການຢາ.

2 ຝ່າຍເນັ້ນໜັກເຖິງຄວາມປາດຖະໜາຢາກລົງເລິກການຮ່ວມມືດ້ານມະນຸດສະທຳ, ໄດ້ຮັບຮູ້ຄວາມສຳຄັນຂອງການຮ່ວມມືດ້ານການສຶກສາ ແລະ ບຳລຸງສ້າງ, ເພີ່ມທະວີການສອນພາສາຫວຽດນາມ ຢູ່ ສະຫະພັນລັດເຊຍ ແລະ ລັດເຊຍ ຢູ່ ຫວຽດນາມ, ຊຸກຍູ້ການຮ່ວມມືຜ່ານເຄືອຂ່າຍມະຫາວິທະຍາໄລເຕັກນິກ ຫວຽດນາມ - ລັດເຊຍ; ລັດເຊຍ ສືບຕໍ່ສະໜອງທຶນສຶກສາບຳລຸງສ້າງແຫຼ່ງຊັບພະຍາກອນມະນຸດໃຫ້ຫວຽດນາມ ໃນບັນດາຂົງເຂດວິທະຍາສາດ, ເຕັກໂນໂລຢີ, ສິລະປະ ແລະ ອື່ນໆ, 2 ຝ່າຍຍິນດີຊຸກຍູ້ການພົວພັນແລກປ່ຽນປະຊາຊົນ ແລະ ເພີ່ມທະວີການຮ່ວມມືລະຫວ່າງບັນດາທ້ອງຖິ່ນຂອງ 2 ປະເທດ ເພື່ອສຶກສາໃຫ້ລຸ້ນໜຸ່ມຂອງສອງປະເທດກ່ຽວກັບສາຍພົວພັນມິດຕະພາບທີ່ເປັນມູນເຊື້ອ; ເຫັນດີເປັນເອກະພາບຈັດຕັ້ງບັນດາການເຄື່ອນໄຫວພົບປະແລກປ່ຽນວັດທະນະທຳ, ການສະແດງສິລະປະ… ພິເສດແມ່ນເນື່ອງໃນໂອກາດສະເຫຼີມສະຫຼອງ 75 ປີແຫ່ງວັນສ້າງຕັ້ງການພົວພັນທາງການທູດ ແນໃສ່ເພີ່ມທະວີຄວາມເຂົ້າໃຈເຊິ່ງກັນ ແລະກັນລະຫວ່າງປະຊາຊົນສອງປະເທດ.

Thủ tướng Phạm Minh Chính hội đàm với Thủ tướng Nga- Ảnh 5. — ທ່ານນາຍົກລັດຖະມົນຕີ ລັດເຊຍ Mikhail Mishustin ກ່າວຄຳເຫັນທີ່ການເຈລະຈາ. ພາບ: ຮືຮົ່ງ

ນາຍົກລັດຖະມົນຕີສອງປະເທດປຶກສາຫາລືບັນດາມາດຕະການເພີ່ມທະວີການຮ່ວມມືໃນຂົງເຂດທ່ອງທ່ຽວ. ການຟື້ນຟູຖ້ຽວບິນໂດຍກົງເປັນປົກກະຕິ ແລະ ຖ້ຽວບິນ charter ລະຫວ່າງ 2 ປະເທດໄດ້ປະກອບສ່ວນຊຸກຍູ້ຈຳນວນນັກທ່ອງທ່ຽວລະຫວ່າງ 2 ປະເທດ. 2 ຝ່າຍກໍ່ເຫັນດີເປັນເອກະພາບຊຸກຍູ້ການຮ່ວມມືດ້ານຄົມມະນາຄົມຂົນສົ່ງ, ໃນນັ້ນມີການເດີນທະເລ, ທາງລົດໄຟ ແລະ ການຂົນສົ່ງຕົວເມືອງ.

ກ່ຽວກັບບັນດາບັນຫາທີ່ຍັງຄົງຄ້າງ, ທ່ານນາຍົກລັດຖະມົນຕີ 2 ທ່ານ ໄດ້ມອບໝາຍໃຫ້ບັນດາກະຊວງ, ຂະແໜງການທີ່ກ່ຽວຂ້ອງຂອງ ຫວຽດນາມ ແລະ ລັດເຊຍ ປຶກສາຫາລື, ຄົ້ນຄວ້າ ແລະ ແນະນຳບັນດາມາດຕະການແກ້ໄຂບົນຈິດໃຈຮັບປະກັນຜົນປະໂຫຍດຂອງທຸກຝ່າຍ.

ສະເໜີລັດເຊຍສະໜັບສະໜູນຄວາມເສລີໃນການເດີນເຮືອ ແລະ ການບິນຢູ່ທະເລຕາເວັນອອກ

2 ຝ່າຍກໍ່ປຶກສາຫາລືບັນດາບັນຫາສາກົນ ແລະ ພາກພື້ນທີ່ຕ່າງຝ່າຍຕ່າງມີຄວາມສົນໃຈ ແລະ ຮ່ວມມືໃນບັນດາເວທີປາໄສສາກົນ; ຢືນຢັນຈະສືບຕໍ່ສົມທົບກັນຢ່າງແໜ້ນແຟ້ນ ແລະ ສະໜັບສະໜູນເຊິ່ງກັນ ແລະ ກັນຢູ່ບັນດາເວທີປາໄສຫຼາຍຝ່າຍ. ທ່ານນາຍົກລັດຖະມົນຕີ ຟ້າມບິ່ງມິງ ສະເໜີ ລັດເຊຍ ສະໜັບສະໜູນເລື່ອງຮັບປະກັນຄວາມໝັ້ນຄົງ, ຄວາມປອດໄພ, ຄວາມເສລີໃນການເດີນທະເລ ແລະ ການບິນຢູ່ທະເລຕາເວັນອອກ, ແກ້ໄຂການພິພາດໂດຍສັນຕິວິທີບົນພື້ນຖານກົດໝາຍສາກົນ ແລະ ກົດບັດສະຫະປະຊາຊາດ, ພິເສດແມ່ນສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982.

Thủ tướng Phạm Minh Chính hội đàm với Thủ tướng Nga- Ảnh 6. — ທ່ານນາຍົກລັດຖະມົນຕີ Pham Minh Chinh ກ່າວຄຳເຫັນທີ່ກອງປະຊຸມ. ພາບ: ຮືຮົ່ງ

ທ່ານນາຍົກລັດຖະມົນຕີ ຟ້າມບິ່ງມິງ ໄດ້ຂອບອົກຂອບໃຈການນຳ ແລະ ລັດຖະບານ ລັດເຊຍ ທີ່ສະຫງວນໃຫ້ປະຊາຄົມຊາວຫວຽດນາມ ຢູ່ ລັດເຊຍ ແລະ ຫວັງວ່າຈະສືບຕໍ່ສ້າງເງື່ອນໄຂສະດວກ, ຮັບປະກັນຄວາມປອດໄພຂອງປະຊາຊົນ ແລະ ຊັບສິນໃຫ້ແກ່ປະຊາຄົມຊາວ ຫວຽດນາມ; ຢືນຢັນວ່າ, ລັດຖະບານ ຫວຽດນາມ ຍາມໃດກໍ່ເອົາໃຈໃສ່ ແລະ ຮັບປະກັນເງື່ອນໄຂສະດວກໃຫ້ແກ່ພົນລະເມືອງ ລັດເຊຍ ດຳລົງຊີວິດ ແລະ ຮ່ຳຮຽນຢູ່ ຫວຽດນາມ.

ທ່ານນາຍົກລັດຖະມົນຕີ 2 ທ່ານເຊື່ອໝັ້ນວ່າ ບັນດາໝາກຜົນອັນດີງາມຂອງການຢ້ຽມຢາມຈະສ້າງບັນດາບາດກ້າວພັດທະນາຮອບດ້ານຂອງການຮ່ວມມືຫວຽດນາມ - ລັດເຊຍ, ເພື່ອຜົນປະໂຫຍດຂອງປະຊາຊົນສອງປະເທດ, ເພື່ອສັນຕິພາບ ແລະ ສະຖຽນລະພາບຢູ່ພາກພື້ນ ແລະ ໃນໂລກ.

ໄດ້ລົງນາມໃນເອກະສານຮ່ວມມືຫຼາຍສະບັບ

ພາຍຫຼັງການເຈລະຈາ, ທ່ານນາຍົກລັດຖະມົນຕີ ຟ້າມບິ່ງມິງ ເຈີ່ນ ແລະ ທ່ານນາຍົກລັດຖະມົນຕີ Mikhail Mishustin ໄດ້ລົງນາມໃນຖະແຫຼງການຮ່ວມກ່ຽວກັບໝາກຜົນແຫ່ງການຢ້ຽມຢາມທາງລັດຖະກິດຢູ່ ຫວຽດນາມ ຂອງທ່ານນາຍົກລັດຖະມົນຕີ ລັດເຊຍ ແລະ ເປັນສັກຂີພິຍານພິທີລົງນາມໃນເອກະສານຮ່ວມມືຈຳນວນໜຶ່ງໃນຂົງເຂດວິທະຍາສາດ, ຂໍ້ມູນຂ່າວສານ ແລະ ສື່ສານ, ວັດທະນະທຳ ແລະ ອື່ນໆ.