ທ່ານນາຍົກລັດຖະມົນຕີ ຟ້າມບິ່ງມິງ ໄດ້ພົບປະກັບນາຍົກລັດຖະມົນຕີ ນິວຊີແລນ ໃນໂອກາດເຂົ້າຮ່ວມກອງປະຊຸມອາຊຽນ

2 ຝ່າຍໄດ້ເນັ້ນໜັກເຖິງຄວາມຈຳເປັນຕ້ອງເພີ່ມທະວີການຮ່ວມມືໃນບັນດາຂົງເຂດດັ້ງເດີມຄື: ການຄ້າ, ການສຶກສາ, ກະສິກຳ, ແລະ ຜັນຂະຫຍາຍບັນດາຂົງເຂດໃໝ່ຄື: ການຕອບໂຕ້ການປ່ຽນແປງຂອງດິນຟ້າອາກາດ, ເສດຖະກິດຂຽວ, ເສດຖະກິດດີຈີຕອນ.

ທ່ານນາຍົກລັດຖະມົນຕີ ຟ້າມບິ່ງມິງ ໄດ້ພົບປະກັບທ່ານນາຍົກລັດຖະມົນຕີ ນິວຊີແລນ Christopher Luxon. (ພາບ: ເຢືອງ/VNA)

ຕາມນັກຂ່າວພິເສດ VNA ໃຫ້ຮູ້ວ່າ, ວັນທີ 10 ຕຸລາ, ໃນໂອກາດເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ບັນດາກອງປະຊຸມສຸດຍອດທີ່ກ່ຽວຂ້ອງຢູ່ນະຄອນຫຼວງວຽງຈັນ, ລາວ, ທ່ານນາຍົກລັດຖະມົນຕີ ຟ້າມບິ່ງມິງ ໄດ້ມີການພົບປະກັບທ່ານນາຍົກລັດຖະມົນຕີ ນິວຊີແລນ Christopher Luxon.

ທີ່ການພົບປະ, ທ່ານນາຍົກລັດຖະມົນຕີ ຟ້າມບິ່ງມິງ ໄດ້ສະແດງຄວາມຂອບໃຈຕໍ່ລັດຖະບານ ແລະ ປະຊາຊົນ ນິວຊີແລນ ທີ່ໄດ້ໜູນຊ່ວຍຫວຽດນາມ ດ້ວຍງົບປະມານ 1 ລ້ານ NZD ເພື່ອຜ່ານຜ່າຜົນຮ້າຍຢ້ອນຫຼັງຈາກພະຍຸໄຕ້ຝຸ່ນ Yagi.

ທ່ານນາຍົກລັດຖະມົນຕີ ຟ້າມບິ່ງມິງ ກໍ່ຂອບໃຈການຕ້ອນຮັບອັນອົບອຸ່ນ ແລະ ສະແດງຄວາມເພິ່ງພໍໃຈຕໍ່ຜົນການຢ້ຽມຢາມ ນິວຊີແລນ ຢ່າງເປັນທາງການໃນເດືອນ 3/2024.

ທ່ານນາຍົກລັດຖະມົນຕີ 2 ທ່ານ ມີຄວາມຍິນດີເປັນສັກຂີພິຍານຕໍ່ການສືບຕໍ່ພັດທະນາ ແລະ ຮັດແໜ້ນການພົວພັນ ຫວຽດນາມ - ນິວຊີແລນ; ຕົກລົງຈະສົມທົບກັນປະຕິບັດບັນດາການເຄື່ອນໄຫວທີ່ມີຄວາມໝາຍເພື່ອສະເຫຼີມສະຫຼອງ 50 ປີແຫ່ງວັນສ້າງສາຍພົວພັນທາງການທູດ ແລະ 5 ປີແຫ່ງວັນສ້າງຕັ້ງການພົວພັນຄູ່ຮ່ວມມືຍຸດທະສາດລະຫວ່າງ 2 ປະເທດໃນປີ 2025.

ປຶກສາຫາລືກ່ຽວກັບທິດທາງການຮ່ວມມືໃນອະນາຄົດ, ສອງຝ່າຍໄດ້ເນັ້ນໜັກເຖິງຄວາມຮຽກຮ້ອງຕ້ອງການເພີ່ມທະວີການຮ່ວມມືໃນບັນດາຂົງເຂດພື້ນເມືອງຄື: ການຄ້າ - ການລົງທຶນ, ການສຶກສາ - ບຳລຸງສ້າງ, ກະສິກຳ, ການພົບປະແລກປ່ຽນປະຊາຊົນ ແລະ ເປີດກວ້າງບັນດາຂົງເຂດໃໝ່ຄື ການຮັບມືກັບການປ່ຽນແປງຂອງດິນຟ້າອາກາດ, ເສດຖະກິດສີຂຽວ, ເສດຖະກິດດີຈີຕອນ.

ທ່ານນາຍົກລັດຖະມົນຕີ ຟ້າມບິ່ງມິງ ສະເໜີ 2 ຝ່າຍວາງອອກບັນດາທິດທາງສະເພາະ, ບາດກ້າວບຸກທະລຸເພື່ອແນໃສ່ເຮັດໃຫ້ວົງເງິນການຄ້າ 2 ສົ້ນບັນລຸ 2 ຕື້ USD ຮອດທ້າຍປີ 2024 ແລະ 3 ຕື້ USD ໃນປີ 2026; ຂອບໃຈ ແລະ ຮຽກຮ້ອງ ນິວຊີແລນ ສືບຕໍ່ເປີດກວ້າງການຊ່ວຍເຫຼືອດ້ານການພັດທະນາຢ່າງເປັນທາງການ (ODA), ໜູນຊ່ວຍການຝຶກອົບຮົບພາສາອັງກິດ ແລະ ຝຶກອົບຮົມວິຊາສະເພາະໃຫ້ແກ່ພະນັກງານສູນກາງ ແລະທ້ອງຖິ່ນຂອງຫວຽດນາມ.

ທ່ານນາຍົກລັດຖະມົນຕີ Christopher Luxon ໄດ້ເຫັນດີກັບຂໍ້ສະເໜີຂອງທ່ານນາຍົກລັດຖະມົນຕີ Pham Minh Chinh; ເນັ້ນໜັກວ່າ ຫວຽດນາມ ແມ່ນຄູ່ຮ່ວມມືແຖວໜ້າຂອງ ນິວຊີແລນ ໃນພາກພື້ນ; ຢືນຢັນວ່າ ນິວຊີແລນ ຈະຊຸກຍູ້ທຸກຂົງເຂດຮ່ວມມືທີ່ຕ່າງຝ່າຍຕ່າງມີຜົນປະໂຫຍດ, ສືບຕໍ່ໜູນຊ່ວຍ ODA ໃນຂົງເຂດຕົວຈິງຕາມຄວາມຕ້ອງການພັດທະນາຂອງຫວຽດນາມ, ພິເສດແມ່ນກະສິກຳເຕັກໂນໂລຢີສູງ, ການຄຸ້ມຄອງ ແລະ ຮັບມືກັບໄພພິບັດ, ພັດທະນາແຫຼ່ງຊັບພະຍາກອນມະນຸດ ແລະ ອື່ນໆ.

ນາຍົກລັດຖະມົນຕີ 2 ທ່ານໄດ້ເຫັນດີສືບຕໍ່ສົມທົບກັນຢ່າງແໜ້ນແຟ້ນຢູ່ບັນດາເວທີປາໄສຫຼາຍຝ່າຍ, ປະກອບສ່ວນຕັ້ງໜ້າ ແລະ ມີຄວາມຮັບຜິດຊອບເຂົ້າໃນການແກ້ໄຂບັນດາບັນຫາຮ່ວມມືໃນພາກພື້ນ ແລະ ທົ່ວໂລກ.

ທ່ານນາຍົກລັດຖະມົນຕີ Christopher Luxon ເນັ້ນໜັກວ່າ: ການນຳ 2 ປະເທດແບ່ງປັນຫຼາຍທັດສະນະກ່ຽວກັບບັນດາບັນຫາພາກພື້ນ ແລະ ສາກົນ ແມ່ນພື້ນຖານເພື່ອແນໃສ່ເພີ່ມທະວີການຮ່ວມມື, ປະກອບສ່ວນສ້າງສາສັນຕິພາບ, ສະຖຽນລະພາບ ແລະ ພັດທະນາຂອງພາກພື້ນອາຊີ - ປາຊີຟິກ ແລະ ມະຫາສະໝຸດອິນເດຍ.

ເນື່ອງໃນໂອກາດນີ້, ທ່ານນາຍົກລັດຖະມົນຕີ ຟ້າມບິ່ງມິງ ໄດ້ເຊື້ອເຊີນທ່ານນາຍົກລັດຖະມົນຕີ ນິວຊີແລນ Christopher Luxon ມາຢ້ຽມຢາມຫວຽດນາມ; ນາຍົກລັດຖະມົນຕີນິວຊີແລນ Christopher Luxon ຍອມຮັບຢ່າງມີຄວາມສຸກ./.

ທີ່ມາ