ຕະຫຼາດການບິນຫວຽດນາມຟື້ນຕົວດີທີ່ສຸດໃນອາຊີ

ຂໍ້ມູນນີ້ແມ່ນທ່ານຮອງສາດສະດາຈານ, ເຈີ່ນຮ່ວາງອານ, ປະທານສະພາບັນດິດການບິນຫວຽດນາມ ໃນບົດລາຍງານຂອງກອງປະຊຸມວິທະຍາສາດສາກົນ, ເວທີປາໄສວິທະຍາສາດການບິນ ແລະ ງານວາງສະແດງການບິນປີ 2023 ທີ່ນະຄອນ ໂຮ່ຈີມິນ.

ທ່ານຮອງສາດສະດາຈານ, ເຈີ່ນຮ່ວາຍອານ ໃຫ້ຮູ້ວ່າ: ຕະຫຼາດການບິນຫວຽດນາມ ກໍ່ແມ່ນຕະຫຼາດທີ່ມີອັດຕາຟື້ນຕົວດີທີ່ສຸດຢູ່ພາກພື້ນອາຊີ - ປາຊີຟິກ.

ຕາມທ່ານຮອງສາດສະດາຈານ, ເຈີ່ນຮ່ວາຍອານແລ້ວ, ໃນຊຸມປີມໍ່ໆມານີ້, ເຖິງວ່າຈະປະສົບກັບຄວາມຫຍຸ້ງຍາກຫຼາຍຢ່າງໃນສະພາບການທົ່ວໂລກເມື່ອໄດ້ຮັບຜົນກະທົບຢ່າງບໍ່ຢຸດຢັ້ງຈາກໂລກລະບາດ, ເສດຖະກິດ ແລະ ສັງຄົມຢູ່ພາກພື້ນ, ແຕ່ອຸດສາຫະກຳການບິນຫວຽດນາມ ຍັງຄົງຮັກສາທີ່ຕັ້ງເປັນປະເທດທີ່ມີຄວາມປອດໄພ ແລະ ຄວາມປອດໄພການບິນສູງສຸດໃນພາກພື້ນ.

ພ້ອມກັນນັ້ນ, ສາຍການບິນຫວຽດນາມ ຍັງຖືວ່າມີບໍລິການຂົນສົ່ງທາງອາກາດດີທີ່ສຸດ ດ້ວຍເຫດການທີ່ Vietnam Airlines ໄດ້ຮັບກຽດຈາກ APEX ເປັນ “ສາຍການບິນສາກົນ 5 ດາວ”.

ເພື່ອບັນລຸໄດ້ໝາກຜົນດັ່ງກ່າວ, ບັນດາວິສາຫະກິດ ແລະ ບັນດາອົງການທີ່ດຳເນີນທຸລະກິດການບິນພົນລະເຮືອນໄດ້ມານະພະຍາຍາມຢ່າງຕັ້ງໜ້າ. ເຖິງຢ່າງໃດກໍຕາມ, ໃນສະພາບການທີ່ໂລກຜັນແປໄປ, ອຸດສາຫະກຳການບິນກໍ່ຕ້ອງມີການປ່ຽນແປງ, ຫັນປ່ຽນເພື່ອຮັກສາທ່າອ່ຽງທົ່ວໄປ.

ວັນທີ 11 ກັນຍານີ້, ກອງປະຊຸມວິທະຍາສາດສາກົນ, ເວທີປາໄສວິທະຍາສາດການບິນ ແລະ ງານວາງສະແດງການບິນ 2023 ໄດ້ໄຂຂຶ້ນຢູ່ນະຄອນໂຮ່ຈິມິນ.

ໂດຍປະເຊີນໜ້າກັບກາລະໂອກາດ ແລະ ສິ່ງທ້າທາຍ, ອົງການການບິນພົນລະເຮືອນຫວຽດນາມ ໄດ້ກຳນົດທິດຫັນປ່ຽນໃຫ້ແກ່ການບິນພົນລະເຮືອນຂອງຫວຽດນາມ. ເປົ້າໝາຍສຳຄັນຂອງອຸດສາຫະກຳການບິນແມ່ນການເຂົ້າເຖິງ ແລະ ນຳໃຊ້ເຕັກໂນໂລຊີທີ່ກ້າວໜ້າ ແລະ ທັນສະ ໄໝ, ປ່ຽນຈາກການນຳໃຊ້ພະລັງງານຟອດຊິນມາເປັນພະລັງງານສີຂຽວ, ຫຼຸດຜ່ອນການປ່ອຍອາຍພິດເຮືອນແກ້ວໃນກິດຈະການການບິນພົນລະເຮືອນ.

ນອກນີ້, ຕ້ອງຜັນຂະຫຍາຍບັນດານະໂຍບາຍປົກປັກຮັກສາສິ່ງແວດລ້ອມ, ຊຸກຍູ້ບັນດາຮູບແບບນະວັດຕະກຳ, ໂຄງການຄົ້ນຄວ້າວິທະຍາສາດ, ນຳໃຊ້ເຕັກໂນໂລຢີ 4.0 ໃນຂົງເຂດປົກປັກຮັກສາສິ່ງແວດລ້ອມ ແລະ ຮັບປະກັນຄວາມໝັ້ນຄົງດ້ານສິ່ງແວດລ້ອມໃນຂົງເຂດການບິນພົນລະເຮືອນ.

ພ້ອມກັນນັ້ນ, ກໍ່ສ້າງບັນດານະໂຍບາຍພັດທະນາພື້ນຖານໂຄງລ່າງການບິນສີຂຽວ, ຮັບປະກັນປະສິດທິຜົນດ້ານເສດຖະກິດ ແລະ ປົກປັກຮັກສາສິ່ງແວດລ້ອມ, ປະກອບສ່ວນຫຼຸດຜ່ອນການປ່ອຍອາຍພິດເຮືອນແກ້ວ, ເພີ່ມທະວີການຕ້ານການປ່ຽນແປງຂອງດິນຟ້າອາກາດ ແລະ ລະດັບນ້ຳທະເລເພີ່ມຂຶ້ນ.

ນອກຈາກນັ້ນ, ອຸດສາຫະກຳການບິນຫວຽດນາມ ຍັງມຸ່ງໄປເຖິງການປະຕິບັດໂຄງການພັດທະນາພາຫະນະທີ່ເປັນມິດກັບສິ່ງແວດລ້ອມຢູ່ສະໜາມບິນ, ໃນນັ້ນມີລົດຍົນໄຟຟ້າ, ພັດທະນາສູນຂົນສົ່ງສີຂຽວ, ທ່າເຮືອສີຂຽວ, ນຳໃຊ້ເຕັກໂນໂລຊີໃໝ່ ແລະ ພະລັງງານໃໝ່ເພື່ອທົດແທນນ້ຳມັນເຊື້ອໄຟພື້ນເມືອງໃຫ້ແກ່ພາຫະນະ ແລະ ອຸປະກອນໃນການເຄື່ອນໄຫວການບິນ.

ນຳໃຊ້ເຕັກໂນໂລຊີດິຈິຕອລເພື່ອເພີ່ມປະສິດທິພາບການຄຸ້ມຄອງ ແລະ ດຳເນີນງານພື້ນຖານໂຄງລ່າງການບິນ ແລະ ການເຄື່ອນໄຫວຂົນສົ່ງທາງອາກາດ, ຮັບປະກັນຄວາມປອດໄພ, ລຽບງ່າຍ ແລະ ຫຼຸດຜ່ອນການຊົມໃຊ້ພະລັງງານ.

ເພີ່ມທະວີການນຳໃຊ້ນ້ຳມັນເຊື້ອໄຟການບິນແບບຍືນຍົງ (SAF) ເພື່ອທົດແທນນ້ຳມັນເຊື້ອໄຟການບິນແບບດັ້ງເດີມຢູ່ເຮືອບິນຂອງຫວຽດນາມ, ເພື່ອແນໃສ່ຫຼຸດຜ່ອນການປ່ອຍອາຍພິດກາກບອນສຸດທິ, ເພື່ອແນໃສ່ປະຕິບັດຄຳໝັ້ນສັນຍາຂອງທ່ານນາຍົກລັດຖະມົນຕີທີ່ກອງປະຊຸມ COP 26 ເພື່ອມຸ່ງໄປເຖິງການສູ້ຊົນບັນລຸລະດັບການປ່ອຍອາຍພິດສຸດທິຮອດປີ 2050.

ຕາມອົງການການບິນພົນລະເຮືອນຫວຽດນາມ, ປະຈຸບັນ, ບັນດາສາຍການບິນພາຍໃນປະເທດພວມມີຄວາມສົນໃຈຫຼາຍໃນການຫັນເປັນທິດທາງທີ່ເປັນມິດກັບສິ່ງແວດລ້ອມ.

ໃນໄລຍະຈະມາເຖິງ, ບໍລິສັດການບິນ ຫວຽດນາມ ສືບຕໍ່ປະຕິບັດບັນດາການເຄື່ອນໄຫວທີ່ເປັນມິດກັບສິ່ງແວດລ້ອມ ແລະ ເປັນມິດກັບດິນຟ້າອາກາດ, ຮັບປະກັນການດຳເນີນທຸລະກິດແບບຍືນຍົງ ມຸ່ງໄປເຖິງຈຸດໝາຍບໍ່ປ່ອຍອາຍພິດຮອດປີ 2050.

ລຸງ Y

ທີ່ມາ