ເພີ່ມທະວີການຮ່ວມມືຢ່າງມີປະສິດທິຜົນລະຫວ່າງບັນດາມະຫາວິທະຍາໄລອາເມລິກາ ແລະ ຫວຽດນາມ

ກປ.ອອນໄລ - ຕອນບ່າຍວັນທີ 19 ມີນາ, ຢູ່ສໍານັກງານລັດຖະບານ, ທ່ານຮອງນາຍົກລັດຖະມົນຕີ ເລມີງຄາຍ ໄດ້ໃຫ້ການຕ້ອນຮັບທ່ານສາດສະດາຈານ Thomas Vallely, ຜູ້ອໍານວຍການໂຄງການຫວຽດນາມ ຢູ່ມະຫາວິທະຍາໄລ Harvard ແລະບັນດານັກຊ່ຽວຊານຈາກມະຫາວິທະຍາໄລ Fulbright ຫວຽດນາມ.

ທ່ານຮອງນາຍົກລັດຖະມົນຕີ Le Minh Khai ໄດ້ໃຫ້ການຕ້ອນຮັບທ່ານສາດສະດາຈານ Thomas Vallely, ຜູ້ອຳນວຍການໂຄງການ ຫວຽດນາມ ຢູ່ມະຫາວິທະຍາໄລ Harvard ແລະ ບັນດານັກຊ່ຽວຊານຈາກມະຫາວິທະຍາໄລ Fulbright ຫວຽດນາມ. (ພາບ: VGP)

ທີ່ການຕ້ອນຮັບ, ທ່ານຮອງນາຍົກລັດຖະມົນຕີ Le Minh Khai ຕີລາຄາສູງສາດສະດາຈານ Thomas Vallely ໄດ້ປະກອບສ່ວນສຳຄັນເຂົ້າໃນການຊຸກຍູ້ການພົວພັນ ຫວຽດນາມ - ອາເມລິກາ, ໃນນັ້ນມີບັນດາຂົງເຂດສຶກສາ ແລະ ການເຈລະຈານະໂຍບາຍ. ທ່ານຮອງນາຍົກລັດຖະມົນຕີ ສະແດງຄວາມເຫັນວ່າ: “ສາດສະດາຈານ Thomas Vallely ແມ່ນເພື່ອນສະໜິດສະໜົມຂອງຫວຽດນາມ ແທ້ໆ. ຕາມທ່ານຮອງນາຍົກລັດຖະມົນຕີແລ້ວ, ການລົງນາມໃນຖະແຫຼງການຮ່ວມຂອງບັນດາການນຳຂອງຫວຽດນາມ ແລະ ອາເມລິກາ ເພື່ອຍົກລະດັບການພົວພັນສອງຝ່າຍຂຶ້ນເປັນຄູ່ຮ່ວມມືຍຸດທະສາດຮອບດ້ານ ໄດ້ສ້າງພື້ນຖານຊຸກຍູ້ການຮ່ວມມືຢ່າງເລິກເຊິ່ງກວ້າງຂວາງ, ພິເສດແມ່ນການຮ່ວມມືໃນຂົງເຂດການສຶກສາ-ບຳລຸງສ້າງ. ປະຈຸບັນ, ສອງຝ່າຍໄດ້ເລີ່ມກຳນົດເນື້ອໃນຂອງຖະແຫຼງການຮ່ວມ. ຫວ່າງມໍ່ໆມານີ້, ໂດຍໄດ້ລົງນາມໃນສັນຍາຮ່ວມມືລະດັບລັດຖະມົນຕີກ່ຽວກັບການສຶກສາ ແລະ ບຳລຸງສ້າງ (ເດືອນພະຈິກ 2023), ທ່ານຮອງນາຍົກລັດຖະມົນຕີ ເລມິນຄາຍ ເຊື່ອໝັ້ນວ່າ, ນີ້ຈະແມ່ນພື້ນຖານເພື່ອຊຸກຍູ້ການຮ່ວມມືຢ່າງແໜ້ນແຟ້ນລະຫວ່າງບັນດາມະຫາວິທະຍາໄລອາເມລິກາ ແລະ ຫວຽດນາມ. ທ່ານຮອງນາຍົກລັດຖະມົນຕີ ປາດຖະໜາວ່າ ອາເມລິກາ ສືບຕໍ່ລົງທຶນໄລຍະຍາວຢູ່ມະຫາວິທະຍາໄລ Fulbright ຢູ່ຫວຽດນາມ, ພ້ອມທັງຢືນຢັນວ່າ ລັດຖະບານຫວຽດນາມ ຈະສືບຕໍ່ເອົາໃຈໃສ່, ໜູນຊ່ວຍບັນດາມະຫາວິທະຍາໄລ Fulbright ກາຍເປັນໜຶ່ງໃນບັນດາສູນຝຶກອົບຮົມຊັບພະຍາກອນມະນຸດຄຸນນະພາບສູງຢູ່ຫວຽດນາມ. ຕາງໜ້າລັດຖະບານຫວຽດນາມ, ທ່ານຮອງນາຍົກລັດຖະມົນຕີ ເລມີງຄາຍ ໄດ້ສະແດງຄວາມຂອບໃຈເປັນສ່ວນຕົວ ທ່ານ Thomas Vallely, ໂຮງຮຽນ Harvard Kennedy ແລະ ມະຫາວິທະຍາໄລ Fulbright ທີ່ໄດ້ສົມທົບກັນຢ່າງແໜ້ນແຟ້ນກັບກະຊວງການຕ່າງປະເທດ ໃນການຊຸກຍູ້ ແລະ ກະກຽມໃຫ້ແກ່ໂຄງການການນໍາຂັ້ນສູງຫວຽດນາມ (VELP) 2024, ຄາດວ່າຈະຈັດຂຶ້ນໃນເດືອນເມສາຈະມາເຖິງ. ສາດສະດາຈານ Thomas Vallely ຂອບອົກຂອບໃຈທ່ານຮອງນາຍົກລັດຖະມົນຕີ ທີ່ໄດ້ສະຫລະເວລາມາພົບປະ; ທ່ານໄດ້ໃຫ້ທັດສະນະກ່ຽວກັບເນື້ອໃນທີ່ຄາດໄວ້ຂອງໂຄງການ VELP ແລະ ເນັ້ນໜັກວ່າ ພວມມຸ່ງໄປເຖິງບັນດາລາຍການປຶກສາຫາລືຢູ່ VELP 2024 ດ້ວຍບັນດາເນື້ອໃນເຄື່ອນໄຫວ ແລະ ປັບປຸງໃໝ່ທີ່ເໝາະສົມກັບການພັດທະນາຂອງໂລກໃນປະຈຸບັນ ແລະ ພັດທະນາເສດຖະກິດຫວຽດນາມ, ພິເສດແມ່ນບັນດາມາດຕະການແກ້ໄຂທັງຮັບປະກັນສະຖຽນລະພາບເສດຖະກິດມະຫາພາກ, ງົບປະມານ ແລະ ນະໂຍບາຍເງິນຕາ ແລະ ການພັດທະນາເສດຖະກິດແບບຍືນຍົງໃນສະພາບການຜັນແປຂອງໂລກໃນຕໍ່ໜ້າ.

ເພີ່ມທະວີການຮ່ວມມືຢ່າງແທດຈິງ ແລະ ມີປະສິດທິຜົນລະຫວ່າງບັນດາມະຫາວິທະຍາໄລອາເມລິກາ ແລະ ຫວຽດນາມ

ທ່ານຮອງນາຍົກລັດຖະມົນຕີ Le Minh Khai ໄດ້ໃຫ້ການຕ້ອນຮັບສາດສະດາຈານ Thomas Vallely, ຜູ້ອຳນວຍການໂຄງການ ຫວຽດນາມ ຢູ່ມະຫາວິທະຍາໄລ Harvard. (ພາບ: VGP)

ຕາມທ່ານສາດສະດາຈານ Thomas Vallely ແລ້ວ, ໃນຂອບເຂດໂຄງການ VELP 2024, ບັນດານັກຊ່ຽວຊານຍັງໄດ້ແລກປ່ຽນ ແລະ ປຶກສາຫາລືບັນດາຫົວຂໍ້ທີ່ກ່ຽວຂ້ອງເຖິງການພັດທະນາພະລັງງານທົດແທນ; ຄວາມປອດໄພເຄືອຂ່າຍ; cloud computing… ອຸດສາຫະກຳ semiconductor, ການຜະລິດຊິບ ແລະ AI ທົ່ວໂລກ ແລະ ຄວາມສົດໃສດ້ານຂອງ ຫວຽດນາມ ເມື່ອເຂົ້າຮ່ວມໃນຕ່ອງໂສ້ມູນຄ່າເຫຼົ່ານີ້. ທ່ານຮອງນາຍົກລັດຖະມົນຕີ Le Minh Khai ຂອບໃຈສາດສະດາຈານ Thomas Vallely ທີ່ໄດ້ແບ່ງປັນບັນດາເນື້ອໃນທີ່ໜ້າສົນໃຈໃນໂຄງການ VELP 2024...; ກະຊວງການຕ່າງປະເທດໄດ້ຮັບການມອບໝາຍໃຫ້ສົມທົບກັບບັນດາກະຊວງ, ສາຂາ ເພື່ອກະກຽມເນື້ອໃນຢ່າງລະອຽດເພື່ອປຶກສາຫາລືຕື່ມອີກໃນໂຄງການ VELP ໃນຕົ້ນເດືອນເມສາ. ທ່ານຮອງນາຍົກລັດຖະມົນຕີ ປາດຖະໜາວ່າ ໂຄງການ VELP ທີ່ຈະມາເຖິງ ຈະເປີດກ້ວາງແນວຄິດໃໝ່ໃຫ້ບັນດາອົງການຂອງຫວຽດນາມ ໃນການກໍ່ສ້າງ ແລະ ປະຕິບັດບັນດານະໂຍບາຍພັດທະນາ, ບໍ່ພຽງແຕ່ສະເໜີບັນດານະໂຍບາຍສະເພາະ, ເປັນໄປໄດ້ເໝາະສົມກັບເງື່ອນໄຂຂອງ ຫວຽດນາມ ເທົ່ານັ້ນ, ຫາກຍັງໃຫ້ບຸລິມະສິດຈຸດສຸມ, ເສັ້ນທາງ ແລະ ຄວາມສາມາດເຊື່ອມໂຍງເຂົ້າກັບບັນດາແຫຼ່ງກຳລັງສາກົນ. ຂອບໃຈ ສາດສະດາຈານ Thomas Vallely ແລະ ມະຫາວິທະຍາໄລ Harvard ແລະ ມະຫາວິທະຍາໄລ Fulbright ທີ່ໄດ້ໃຫ້ການຮ່ວມມືອັນລ້ຳຄ່າໃນໄລຍະຜ່ານມາ, ທ່ານຮອງນາຍົກລັດຖະມົນຕີ ຫວັງວ່າ ການພົວພັນຮ່ວມມືລະຫວ່າງ ຫວຽດນາມ ແລະ ອາເມລິກາ ເວົ້າລວມ ແລະ ການຮ່ວມມືໃນບັນດາຂົງເຂດປຶກສາຫາລືນະໂຍບາຍ, ພັດທະນາແຫຼ່ງຊັບພະຍາກອນມະນຸດ, ການສຶກສາ ແລະ ບຳລຸງສ້າງ ເວົ້າສະເພາະ ຈະມີບາດກ້າວພັດທະນາຢ່າງແຮງ ແລະ ແທດຈິງກວ່າໃນໄລຍະຈະມາເຖິງ. ທ່ານຮອງນາຍົກລັດຖະມົນຕີ ກໍ່ຫວັງວ່າ ບັນດາໂຄງການແລກປ່ຽນນະໂຍບາຍຂັ້ນສູງຄື VELP ຈະສືບຕໍ່ໄດ້ຮັບການຜັນຂະຫຍາຍຢ່າງມີປະສິດທິຜົນ ແລະ ແທດຈິງໃນຊຸມປີຕໍ່ໜ້າ.

Nhandan.vn

ທີ່ມາ