ລັດຖະມົນຕີການຕ່າງປະເທດອາເມລິກາແລະຈີນຈັດກອງປະຊຸມສອງຝ່າຍຢູ່ນອກກອງປະຊຸມຄວາມໝັ້ນຄົງ Munich

ຢູ່ນອກກອງປະຊຸມຄວາມໝັ້ນຄົງນະຄອນ Munich ທີ່ຈັດຂຶ້ນຢູ່ເຢຍລະມັນ, ທ່ານລັດຖະມົນຕີການຕ່າງປະເທດອາເມລິກາ Antony Blinken ແລະ ທ່ານ Wang Yi ລັດຖະມົນຕີວ່າການກະຊວງການຕ່າງປະເທດຈີນໄດ້ດຳເນີນການພົບປະສອງຝ່າຍໃນວັນທີ 16 ກຸມພານີ້, ໃນຂະນະທີ່ສອງປະເທດພະຍາຍາມເພີ່ມທະວີການພົວພັນລະດັບສູງພາຍຫຼັງຄວາມເຄັ່ງຕຶງເປັນເວລາຍາວນານໃນຫຼາຍບັນຫາ.

ຕາມຂ່າວສານຊິນຮວາ: ທີ່ກອງປະຊຸມ, ທ່ານຫວາງຢີ້, ລັດຖະມົນຕີວ່າການກະຊວງການຕ່າງປະເທດຈີນຢືນຢັນວ່າ, ສອງຝ່າຍມີການປຶກສາຫາລືຢ່າງກົງໄປກົງມາ, ມີເນື້ອແທ້ແລະມີລັກສະນະສ້າງສັນ.

ລັດຖະມົນຕີການຕ່າງປະເທດຈີນ ທ່ານ Wang Yi (ຊ້າຍ) ແລະຄູ່ຕຳແໜ່ງສະຫະລັດ ທ່ານ Antony Blinken ໃນລະຫວ່າງການພົບປະກັນຢູ່ນະຄອນຫຼວງວໍຊິງຕັນ, ວັນທີ 26 ຕຸລາ 2023. (ພາບ: AFP/VNA)

ຕາມທ່ານ ວາງຢີ້ ແລ້ວ, ວຽກງານສຳຄັນທີ່ສຸດຂອງສອງຝ່າຍໃນປັດຈຸບັນແມ່ນການປະຕິບັດແນວທາງຍຸດທະສາດຂອງຜູ້ນຳສອງປະເທດທີ່ກອງປະຊຸມສຸດຍອດເມື່ອທ້າຍປີກາຍນີ້ ເພື່ອຫັນ “ວິໄສທັດຊານຟານຊິດ” ໃຫ້ປະກົດຜົນເປັນຈິງ, ພ້ອມທັງຊຸກຍູ້ການພັດທະນາຢ່າງມີສຸຂະພາບແຂງແຮງ, ໝັ້ນຄົງ ແລະ ຍືນຍົງໃນການພົວພັນສອງຝ່າຍ.

ມື້ດຽວກັນ, ຖະແຫຼງການຂອງກະຊວງການຕ່າງປະເທດອາເມລິກາກ່າວວ່າ, ທີ່ກອງປະຊຸມ, ທ່ານ Blinken ລັດຖະມົນຕີວ່າການກະຊວງການຕ່າງປະເທດອາເມລິກາໄດ້ເນັ້ນໜັກເຖິງຄວາມສຳຄັນຂອງການປະຕິບັດຄວາມຄືບໜ້າທີ່ປະທານາທິບໍດີອາເມລິກາ Joe Biden ແລະ ທ່ານປະທານປະເທດຈີນ Xi Jinping ໄດ້ເຫັນດີບັນລຸໄດ້ທີ່ກອງປະຊຸມ, ໃນນັ້ນມີການຮ່ວມມືຕ້ານຢາເສບຕິດແລະການສື່ສານລະຫວ່າງທະຫານສອງປະເທດ.

ຖະແຫຼງການກ່າວວ່າ, ສອງນັກການທູດລະດັບສູງຂອງອາເມລິກາ ແລະ ຈີນ ໄດ້ປຶກສາຫາລືຫຼາຍບັນຫາຍຸດທະສາດ, ໃນນັ້ນມີການຮັກສາການພົວພັນລະຫວ່າງສອງປະເທດ, ການປຶກສາຫາລືໃນບັນດາຂົງເຂດສຳຄັນກໍ່ຄືບັນດາບັນຫາພາກພື້ນ ແລະ ສາກົນທີ່ຕ່າງຝ່າຍຕ່າງມີຄວາມສົນໃຈ.

ຕາມສື່ມວນຊົນອາເມລິກາແລ້ວ, ການພົບປະລະຫວ່າງລັດຖະມົນຕີການຕ່າງປະເທດສອງປະເທດຄັ້ງນີ້ສາມາດເປີດທາງໃຫ້ແກ່ການສົນທະນາທາງໂທລະສັບລະຫວ່າງຜູ້ນຳສອງປະເທດໃນອະນາຄົດອັນໃກ້ໆນີ້.

(ທີ່ມາ: vietnamplus)

ທີ່ມາ