ກປ.ອອນໄລ - ຕອນບ່າຍວັນທີ 4 ມີນາ, ຢູ່ຮ່າໂນ້ຍ, ທ່ານຮອງລັດຖະມົນຕີກະຊວງການຕ່າງປະເທດ ຫວຽດນາມ ຫງວຽນແມ້ງວູ ແລະ ຮອງລັດຖະມົນຕີກະຊວງການຕ່າງປະເທດ ລັດເຊຍ Vladimir Titov ໄດ້ເປັນປະທານຮ່ວມກອງປະຊຸມປຶກສາຫາລືຍຸດທະສາດ ຫວຽດນາມ - ລັດເຊຍ ຄັ້ງທີ 13 ກ່ຽວກັບການພົວພັນທາງການທູດ, ການປ້ອງກັນຊາດ ແລະປ້ອງກັນຄວາມສະຫງົບ.
2 ຝ່າຍໄດ້ກວດກາຄືນການຮ່ວມມືສອງຝ່າຍໃນທຸກຂົງເຂດ, ພິເສດແມ່ນການເມືອງ - ການທູດ, ປ້ອງກັນຄວາມສະຫງົບ, ການຄ້າ - ການລົງທຶນ, ການຮ່ວມມືຢູ່ບັນດາເວທີປາໄສຫຼາຍຝ່າຍ, ເປັນຕົ້ນໄດ້ປຶກສາຫາລືບັນດາບັນຫາພາກພື້ນ ແລະ ສາກົນທີ່ຕ່າງຝ່າຍຕ່າງມີຄວາມສົນໃຈ.
ສອງຝ່າຍໄດ້ຮັບຮູ້ໝາກຜົນອັນດີງາມທີ່ບັນລຸໄດ້ໃນການຮ່ວມມືໃນໄລຍະມໍ່ໆມານີ້, ພິເສດແມ່ນການແລກປ່ຽນຄະນະຜູ້ແທນ, ການພົວພັນທຸກຂັ້ນ, ພິເສດແມ່ນລະດັບສູງໃນປີ 2023 ໄດ້ຮັບການຜັນຂະຫຍາຍຢ່າງຕັ້ງໜ້າ. 2 ຝ່າຍຢືນຢັນຄວາມຕັດສິນໃຈຮັກສາ ແລະ ຊຸກຍູ້ການພົວພັນຮ່ວມມືລະຫວ່າງສອງປະເທດຢ່າງແທດຈິງ ແລະ ມີປະສິດທິຜົນໃນໄລຍະຈະມາເຖິງ, ພະຍາຍາມປະຕິບັດບັນດາຂໍ້ຕົກລົງ ແລະ ບັນດາໂຄງການຮ່ວມມື.
2 ປະເທດຈະສະເຫຼີມສະຫຼອງ 30 ປີແຫ່ງວັນເຊັນສົນທິສັນຍາວ່າດ້ວຍຫຼັກການພື້ນຖານການພົວພັນມິດຕະພາບ ຫວຽດນາມ - ລັດເຊຍ (ເດືອນມິຖຸນາ 1994 – ມິຖຸນາ 2024) ແລະ ຄົບຮອບ 75 ປີແຫ່ງວັນສ້າງຕັ້ງການພົວພັນທາງການທູດລະຫວ່າງ 2 ປະເທດ (ມັງກອນ 1950 – ມັງກອນ 2025).
ທ່ານຮອງລັດຖະມົນຕີການຕ່າງປະເທດ Titov ຢືນຢັນວ່າ ລັດເຊຍ ໃຫ້ຄຸນຄ່າ ແລະ ປາດຖະໜາຢາກພັດທະນາການພົວພັນກັບ ຫວຽດນາມ ຢ່າງຕັ້ງໜ້າ, ຖືວ່າ ຫວຽດນາມ ແມ່ນຄູ່ຮ່ວມມືທີ່ໄວ້ເນື້ອເຊື່ອໃຈຂອງລັດເຊຍ. ທ່ານສະເໜີໃຫ້ກະຊວງການຕ່າງປະເທດສອງປະເທດສືບຕໍ່ເສີມຂະຫຍາຍບົດບາດປະສານງານໃນການປະຕິບັດບັນດາຂໍ້ຕົກລົງສອງຝ່າຍ, ລົບລ້າງສິ່ງກີດຂວາງ, ເປີດກວ້າງການຮ່ວມມືໃນຂົງເຂດທີ່ມີທ່າແຮງ.
ສະພາບການໂລກ ແລະພາກພື້ນພວມມີການປ່ຽນແປງ, ສອງຝ່າຍເຫັນດີເປັນເອກະພາບວ່າ ຕ້ອງຮັກສາປະສິດທິຜົນຂອງກົນໄກເຈລະຈາຍຸດທະສາດປະຈຳປີ ເພື່ອຊຸກຍູ້ການຮ່ວມມືສອງຝ່າຍຢ່າງທັນການ, ເປັນຕົ້ນແມ່ນການແລກປ່ຽນຂໍ້ມູນຂ່າວສານ, ສົມທົບກັນຢູ່ບັນດາເວທີປາໄສຫຼາຍຝ່າຍ.
2 ຝ່າຍຢືນຢັນຈະຮັກສາການຮ່ວມມືຢ່າງແໜ້ນແຟ້ນຢູ່ສະຫະປະຊາຊາດ, ໃນຂອບເຂດການຮ່ວມມືອາຊຽນ - ລັດເຊຍ, ໃນບັນດາເວທີປາໄສສາກົນອື່ນໆ, ເພື່ອສັນຕິພາບ ແລະ ສະຖຽນລະພາບຢູ່ພາກພື້ນ ແລະ ໃນໂລກ.
ກ່ອນໜ້ານັ້ນ, ຕອນບ່າຍວັນທີ 3 ມີນາ, ທີ່ການພົບປະກັບທ່ານຮອງລັດຖະມົນຕີການຕ່າງປະເທດ ລັດເຊຍ Vladimir Titov, ທ່ານລັດຖະມົນຕີການຕ່າງປະເທດ ບຸຍແທງເຊີນ ໄດ້ຕີລາຄາສູງ 2 ຝ່າຍໄດ້ຮັກສາກົນໄກການເຈລະຈາຍຸດທະສາດ, ແມ່ນຊ່ອງທາງແລກປ່ຽນເພື່ອຊຸກຍູ້ການພົວພັນຮ່ວມມືຫຼາຍດ້ານລະຫວ່າງ 2 ປະເທດ.
ທ່ານລັດຖະມົນຕີ Bui Thanh Son ຢືນຢັນວ່າ ຫວຽດນາມ ຕີລາຄາສູງການພົວພັນມິດຕະພາບທີ່ເປັນມູນເຊື້ອ ແລະ ຄູ່ຮ່ວມມືຍຸດທະສາດຮອບດ້ານກັບ ລັດເຊຍ. ລັດເຊຍ ແມ່ນໜຶ່ງໃນບັນດາຄູ່ຮ່ວມມືບຸລິມະສິດອັນດັບໜຶ່ງໃນນະໂຍບາຍການຕ່າງປະເທດຂອງຫວຽດນາມ.
ບົນຈິດໃຈເປີດອົກເປີດໃຈ ແລະ ໄວ້ເນື້ອເຊື່ອໃຈເຊິ່ງກັນ ແລະ ກັນ, ທ່ານລັດຖະມົນຕີ ຫວັງວ່າ ສອງຝ່າຍຈະສືບຕໍ່ສົມທົບກັນແກ້ໄຂບັນດາຄວາມຫຍຸ້ງຍາກ, ຂໍ້ຄົງຄ້າງ, ຊຸກຍູ້ບັນດາຂົງເຂດຮ່ວມມືທີ່ມີທ່າແຮງ, ຕາມຄວາມມຸ່ງມາດປາດຖະໜາ ແລະ ຜົນປະໂຫຍດຂອງປະຊາຊົນ 2 ປະເທດ.
ທ່ານຮອງລັດຖະມົນຕີກະຊວງການຕ່າງປະເທດລັດເຊຍ ໄດ້ຕີລາຄາສູງຄວາມໄວ້ເນື້ອເຊື່ອໃຈທາງດ້ານການເມືອງ ແລະ ການພົບປະແລກປ່ຽນຄະນະຜູ້ແທນທຸກຂັ້ນ, ພິເສດແມ່ນລະດັບສູງລະຫວ່າງສອງປະເທດ ແລະ ການພັດທະນາຢ່າງເລິກເຊິ່ງຂອງການຮ່ວມມື 2 ຝ່າຍ ແລະ ຫຼາຍຝ່າຍລະຫວ່າງ ຫວຽດນາມ - ລັດເຊຍ.
ທ່ານຮອງລັດຖະມົນຕີ ຫວັງວ່າ ການນຳກະຊວງການຕ່າງປະເທດ 2 ປະເທດຈະຮັກສາຮີດຄອງປະເພນີຂອງການຮ່ວມມືອັນດີງາມ, ເສີມຂະຫຍາຍບົດບາດສົມທົບກັນ ແລະ ຊຸກຍູ້ການພົວພັນຮ່ວມມືລະຫວ່າງ 2 ປະເທດຢ່າງມີປະສິດທິຜົນ, ເປັນການສົມທົບກັນຢ່າງແໜ້ນແຟ້ນໃນເວທີສາກົນ.
2 ຝ່າຍເຫັນດີເປັນເອກະສັນຊຸກຍູ້ການແລກປ່ຽນຄະນະຜູ້ແທນທຸກຂັ້ນ, ລົບລ້າງສິ່ງກີດຂວາງເພື່ອເພີ່ມທະວີການຮ່ວມມືດ້ານເສດຖະກິດ - ການຄ້າ ແລະ ການສຶກສາ - ບຳລຸງສ້າງ.
ທ່ານເລຂາທິການໃຫຍ່, ປະທານປະເທດ ແລະ ນາຍົກລັດຖະມົນຕີ ໄດ້ຮັບການເຂົ້າຢ້ຽມຂ່ຳນັບຂອງປະທານສະພາ Duma ລັດເຊຍ
ທ່ານປະທານປະເທດ Vo Van Thuong ພົບປະກັບທ່ານປະທານາທິບໍດີ ລັດເຊຍ Vladimir Putin
ສະເໜີລັດເຊຍປັບປຸງລະບຽບວິຊາໃຫ້ພົນລະເມືອງຫວຽດນາມງ່າຍຂຶ້ນ
ທີ່ມາ
(0)