ជប៉ុន-ណាតូ យល់ព្រមពង្រឹងកិច្ចសហប្រតិបត្តិការលើវិស័យការពារជាតិ

នាយករដ្ឋមន្ត្រី ជប៉ុន Shigeru Ishiba និងអគ្គលេខាធិការអង្គការសន្ធិសញ្ញាអាត្លង់ទិកខាងជើង (NATO) លោក Mark Rutte ។ (រូបថត៖ ក្យូដូ)

កាលពីថ្ងៃទី៩ ខែមេសា នាយករដ្ឋមន្ត្រីជប៉ុន Shigeru Ishiba និងអគ្គលេខាធិការអង្គការសន្ធិសញ្ញាអាត្លង់ទិកខាងជើង (NATO) លោក Mark Rutte បានយល់ព្រមពង្រឹងកិច្ចសហប្រតិបត្តិការលើវិស័យការពារជាតិ ចំពេលមានបញ្ហាប្រឈមផ្នែកសន្តិសុខជាច្រើន។

តំបន់នៃកិច្ចសហប្រតិបត្តិការដែលបានគ្រោងទុករួមមានការអភិវឌ្ឍន៍បច្ចេកវិទ្យាទំនើបដែលអាចប្រើបានទាំងគោលបំណងស៊ីវិល និង យោធា រួមទាំង បញ្ញាសិប្បនិម្មិត យន្តហោះគ្មានមនុស្សបើក និងបច្ចេកវិជ្ជា Quantum ។

ថ្លែងនៅក្នុងសន្និសីទសារព័ត៌មានរួមគ្នាជាមួយលោក Rutte នៅការិយាល័យនាយករដ្ឋមន្ត្រីក្នុងទីក្រុងតូក្យូ នាយករដ្ឋមន្ត្រីជប៉ុន Ishiba បានសង្កត់ធ្ងន់ថា "អង្គការណាតូដ៏រឹងមាំនឹងនាំមកនូវអត្ថប្រយោជន៍ដ៏អស្ចារ្យដល់ប្រទេសជប៉ុន" និង "យើងស្វាគមន៍ចំពោះការចូលរួមកាន់តែច្រើនឡើងរបស់ណាតូនៅក្នុងតំបន់ឥណ្ឌូ ប៉ាស៊ីហ្វិក "។ លោក Ishiba បាននិយាយថា កិច្ចសហប្រតិបត្តិការក្នុងឧស្សាហកម្មការពារជាតិមានសក្តានុពលខ្លាំង។

សម្រាប់ផ្នែករបស់គាត់ លោក Rutte បានសង្កត់ធ្ងន់លើតម្រូវការសម្រាប់អង្គការណាតូ និងជប៉ុនក្នុងការពង្រឹងកិច្ចសហប្រតិបត្តិការនៅក្នុងពេលវេលា "ដ៏សំខាន់" សម្រាប់សន្តិសុខ និងស្ថិរភាពនៅក្នុងតំបន់អឺរ៉ូ-អាត្លង់ទិក និងឥណ្ឌូប៉ាស៊ីហ្វិក។

អគ្គលេខាធិការអង្គការណាតូក៏បានកោតសរសើរចំពោះការត្រៀមខ្លួនរបស់ប្រទេសជប៉ុនក្នុងការចូលរួមក្នុងប្រតិបត្តិការជំនួយ និងបណ្តុះបណ្តាលសន្តិសុខរបស់អង្គការណាតូសម្រាប់អ៊ុយក្រែន។

មេដឹកនាំទាំងពីរបានចេញសេចក្តីថ្លែងការណ៍រួមដោយសង្កត់ធ្ងន់លើសារៈសំខាន់នៃការរក្សាតំបន់ឥណ្ឌូប៉ាស៊ីហ្វិកដោយសេរី និងបើកចំហដោយផ្អែកលើនីតិរដ្ឋ និងប្រឆាំងនឹងការប៉ុនប៉ងឯកតោភាគីណាមួយដើម្បីផ្លាស់ប្តូរស្ថានភាពដោយកម្លាំងនៅសមុទ្រចិនខាងត្បូង និងសមុទ្រចិនខាងកើត។

កិច្ចប្រជុំនេះធ្វើឡើងក្នុងក្របខ័ណ្ឌនៃដំណើរទស្សនកិច្ចលើកដំបូងរបស់លោក Rutte ទៅកាន់ប្រទេសជប៉ុនក្នុងឋានៈជាអគ្គលេខាធិការអង្គការណាតូ។/.

ប្រភព៖ https://www.vietnamplus.vn/nhat-ban-nato-nhat-tri-tang-cuong-hop-tac-nganh-cong-nghiep-quoc-phong-post1026800.vnp