មូស្គូ៖ អាមេរិក-រុស្ស៊ី មិនអាចសន្ទនាគ្នាបានទេ។

អនុរដ្ឋមន្ត្រីការបរទេសលោក Sergey Ryabkov បាននិយាយដោយសំដៅលើកិច្ចព្រមព្រៀងគ្រប់គ្រងអាវុធរវាងសហរដ្ឋអាមេរិក និងរុស្ស៊ី ថា "ខ្ញុំមិនគិតថានៅពេលអនាគតដ៏ខ្លីនេះកិច្ចសន្ទនានឹងត្រឡប់ទៅដូចពីមុនឡើយ មុនពេលដែលសហរដ្ឋអាមេរិកបានផ្អាកជាឯកតោភាគី" ។

យោងតាមលោក Sergey Ryabkov ទីក្រុងមូស្គូនៅតែកំពុងពិចារណាឆ្លើយតបទៅនឹងសំណើរដើម្បីបន្តការគ្រប់គ្រងអាវុធ និងកិច្ចសន្ទនាស្ថិរភាពជាយុទ្ធសាស្រ្តដែលទីក្រុងវ៉ាស៊ីនតោនបានផ្ញើកាលពីខែមុន។

កាំជ្រួចមីស៊ីលឆ្លងទ្វីប RS 12M Topol របស់រុស្ស៊ី។ (រូបថត៖ Getty)

“ប្រសិនបើទីក្រុងម៉ូស្គូ សម្រេចចិត្តបញ្ជូនការឆ្លើយតបជាផ្លូវការ វានឹងពិបាកសម្រាប់ទីក្រុងវ៉ាស៊ីនតោន ក្នុងការធ្វើសម្បទាននៅក្នុងការសន្ទនា។ សម្បទានឯកតោភាគីពីរុស្ស៊ីគឺគ្មានបញ្ហាទេ។ សំណួរមិនមែនថាតើត្រូវធ្វើសម្បទាន ឬស្វែងរកការសម្រុះសម្រួលទេ ប៉ុន្តែតើការសន្ទនាបែបនេះគឺជាការចាំបាច់ដែរឬទេ» ។

រុស្ស៊ីបញ្ជាក់ពីការត្រៀមខ្លួនក្នុងការពិភាក្សាជាមួយសហរដ្ឋអាមេរិកលើបញ្ហាអាវុធនុយក្លេអ៊ែរ និងបញ្ហាផ្សេងទៀត ប៉ុន្តែគ្រាន់តែឈរលើគោលជំហរស្មើគ្នាប៉ុណ្ណោះ។ អ្នកនាំពាក្យវិមានក្រឹមឡាំង លោក Dmitry Peskov បាននិយាយនៅខែនេះថា ទីក្រុងវ៉ាស៊ីនតោនគួរតែបញ្ឈប់ "ការបង្រៀន" ទីក្រុងម៉ូស្គូ ប្រសិនបើសហរដ្ឋអាមេរិកចង់បន្តកិច្ចចរចាប្រកបដោយផលិតភាពឡើងវិញ។

សហរដ្ឋអាមេរិក និងរុស្ស៊ីបានស្តីបន្ទោសគ្នាម្តងហើយម្តងទៀតចំពោះការខ្វះខាតវឌ្ឍនភាពក្នុងការស្នើដំណោះស្រាយគ្រប់គ្រងអាវុធ។ កាលពីខែកក្កដា សហរដ្ឋអាមេរិកបានស្នើឱ្យបើកកិច្ចចរចាលើ "ក្របខ័ណ្ឌ" ដើម្បីរក្សាដែនកំណត់លើការដាក់ពង្រាយអាវុធនុយក្លេអ៊ែរជាយុទ្ធសាស្ត្រ នៅពេលដែលដែនកំណត់បច្ចុប្បន្នផុតកំណត់នៅឆ្នាំ 2026 ។

មុននេះ ទីប្រឹក្សាសន្តិសុខជាតិអាមេរិក លោក Jake Sullivan បាននិយាយថា រដ្ឋបាលរបស់ប្រធានាធិបតីអាមេរិក Joe Biden បានត្រៀមខ្លួនរួចជាស្រេចក្នុងការចរចា "ដោយគ្មានលក្ខខណ្ឌជាមុន" ជាមួយរុស្ស៊ីលើការគ្រប់គ្រង "ហានិភ័យនុយក្លេអ៊ែរ" និង "ក្របខ័ណ្ឌ" ដើម្បីជំនួសសន្ធិសញ្ញា START ថ្មី បន្ទាប់ពីវាផុតកំណត់។

ទោះបីជាយ៉ាងណាក៏ដោយ ជាការឆ្លើយតប អនុរដ្ឋមន្ត្រីការបរទេសរុស្ស៊ី លោក Sergey Ryabkov បាននិយាយថា ទីក្រុងម៉ូស្គូ មិនអាចពិភាក្សាបញ្ហាគ្រប់គ្រងអាវុធដាច់ដោយឡែកពីបញ្ហាផ្សេងទៀតបានទេ។

ភាពតានតឹងដែលមិនធ្លាប់មានពីមុនមករវាងរុស្ស៊ី និងអាមេរិកបានផ្ទុះឡើង បន្ទាប់ពីទីក្រុងមូស្គូបានចាប់ផ្តើមប្រតិបត្តិការយោធានៅអ៊ុយក្រែនក្នុងខែកុម្ភៈ ឆ្នាំ 2022។ ចាប់តាំងពីពេលនោះមក ទីក្រុងវ៉ាស៊ីនតោនបានដាក់ទណ្ឌកម្មយ៉ាងសន្ធឹកសន្ធាប់លើទីក្រុងមូស្គូ ហើយបានផ្តល់អាវុធ និងជំនួយផ្សេងទៀតដល់ទីក្រុងគៀវ។ ប្រធានាធិបតី Joe Biden បាននិយាយថា សហរដ្ឋអាមេរិកនឹងបន្តគាំទ្រអ៊ុយក្រែន "ដរាបណាចាំបាច់" ។

រុស្ស៊ីអះអាងថា ការផ្ទេរសព្វាវុធធុនធ្ងន់ដែលផលិតដោយលោកខាងលិចទៅកាន់ទីក្រុងគៀវ ធ្វើឱ្យសហរដ្ឋអាមេរិក និងប្រទេសណាតូ ក្លាយជាអន្តរការីដោយផ្ទាល់នៅក្នុងជម្លោះ។

គង់ អាញ់ (ប្រភព៖ RT)

ប្រភព