នាព្រឹកថ្ងៃទី ២៧ ខែវិច្ឆិកា នៅភូមិ Tien Phong (ឃុំ Thanh Trach ស្រុក Bo Trach ខេត្ត Quang Binh) អគ្គិភ័យបានឆាបឆេះរោងចក្រផលិតសាច់ត្រីមួយកន្លែង បណ្តាលឲ្យខូចខាតយ៉ាងដំណំ។
អគ្គិភ័យនេះត្រូវបានគេរកឃើញនៅវេលាម៉ោង៤និង៣០នាទីទៀបភ្លឺនៅរោងចក្រផលិតសាច់ត្រីទំហំ១៦០០ម៉ែត្រការ៉េរបស់ក្រុមហ៊ុន Tam Phat Production and Service Company Limited ។
ក្រោយទទួលបានព័ត៍មាននេះ សមត្ថកិច្ចមូលដ្ឋានបានចល័តរថយន្ត និងកម្លាំងពីនាយកដ្ឋាននគរបាលបង្ការ និងពន្លត់អគ្គិភ័យ និងនគរបាលខេត្ត Quang Binh ជាបន្ទាន់ទៅដល់កន្លែងកើតហេតុ ដើម្បីចូលរួមពន្លត់អគ្គិភ័យ។ ទោះយ៉ាងណាក៏ដោយ ដោយសារតែរោងចក្រមានផ្ទុកនូវសម្ភារៈដែលងាយឆេះជាច្រើន ការពន្លត់អគ្គីភ័យមានការពិបាកខ្លាំងណាស់។
ទិដ្ឋភាពនៃការឆេះរោងចក្រសាច់ត្រីនៅខេត្ត Quang Binh។ (រូបថត៖ BT)
គិតត្រឹមម៉ោង ៨ និង ៣០ នាទីព្រឹក អគ្គិភ័យបានគ្រប់គ្រងបានទាំងស្រុង ប៉ុន្តែទ្រព្យសម្បត្តិនៅក្នុងរោងចក្របានឆេះអស់ស្ទើរតែទាំងស្រុង។ យោងតាមព័ត៌មានពីតំណាងក្រុមហ៊ុន Tam Phat Service and Production Company Limited បានឲ្យដឹងថា ក្នុងពេលមានអគ្គីភ័យនេះ រោងចក្រនេះមានម្សៅត្រីចំនួន ១,២០០តោន, ប្រេងត្រី ២២,០០០លីត្រ, ម៉ាស៊ីនផលិតម្សៅត្រីចំនួន ២គ្រឿង និងទ្រព្យសម្បត្តិជាច្រើនទៀត ដែលគិតជាទឹកប្រាក់ខាតបង់សរុបជិត ១០០ពាន់លានដុង។
កាលពីបីថ្ងៃមុននេះ ក៏មានអគ្គិភ័យឆេះរោងចក្រមួយកន្លែងនៅក្នុងសួនឧស្សាហកម្មមួយក្នុងទីក្រុង Hai Phong ដោយបានបំផ្លាញទ្រព្យសម្បត្តិជាច្រើនផងដែរ។ នៅវេលាម៉ោង១១និង៣១នាទីយប់ ថ្ងៃទី២៣ ខែវិច្ឆិកា មជ្ឈមណ្ឌល១១៤ នាយកដ្ឋាននគរបាលបង្ការ និងពន្លត់អគ្គិភ័យ បានទទួលសេចក្តីរាយការណ៍ពីប្រជាពលរដ្ឋ អំពីអគ្គិភ័យនៅក្រុមហ៊ុន Dong A (ក្នុងសួនឧស្សាហកម្ម Trang Due)។
ភ្លាមៗនោះ រថយន្តពន្លត់អគ្គីភ័យចំនួន ១៥គ្រឿង មកពីក្រុមនគរបាលបង្ការ និងពន្លត់អគ្គីភ័យ នៃតំបន់២ តំបន់៥ តំបន់១ តំបន់ទី៦ An Duong, Hong Bang, An Lao, Kien An ប៉ូលីសក្រុមពន្លត់អគ្គីភ័យជំនាញនៃ Trang Due, An Duong Industrial Park, Nomura Industrial Park... ត្រូវបានចល័តជាបន្ទាន់ទៅកាន់កន្លែងកើតហេតុ។
ជំហានដំបូងសមត្ថកិច្ចកំណត់ថា ផ្ទៃដីឆេះមានទំហំជាង១០០០ម៉ែត្រការ៉េ សម្ភារដែលឆេះមាន សមាសធាតុម៉ាស៊ីនបោកគក់ សម្ភារៈផ្លាស្ទិក... កម្លាំងបានបាញ់ទឹកពន្លត់ ដើម្បីការពារកុំឱ្យភ្លើងឆេះរាលដាលដល់ឃ្លាំង និងរោងចក្រ ហើយទន្ទឹមនឹងនោះបានចល័តកម្មករ រើទ្រព្យសម្បត្តិចេញពីតំបន់ភ្លើង។
នៅវេលាម៉ោង២និង២៦នាទីទៀបភ្លឺ ថ្ងៃទី២៤ ខែវិច្ឆិកា អគ្គិភ័យត្រូវបានគ្រប់គ្រង និងរលត់ទៅវិញ។ ទោះបីជាយ៉ាងណា សម្ភារៈដែលឆេះនោះ គឺជាផ្លាស្ទិច ដែលមានផ្សែងពុល និងហុយខ្លាំង ទើបក្រុមជួយសង្គ្រោះ បន្តបាញ់ទឹកពន្លត់ភ្លើង ហើយចូលទៅក្នុងឃ្លាំង និងរោងចក្រក្បែរខាង។ ស្ថិតិបឋមបង្ហាញថា អគ្គិភ័យនេះមិនបណ្តាលឲ្យមនុស្សណាម្នាក់រងរបួសនោះទេ ប៉ុន្តែរោងចក្រជាង ១០០០ ម៉ែត្រការ៉េ គ្រឿងបន្លាស់ម៉ាស៊ីនបោកគក់ ធ្នើដាក់ទំនិញជាដើមត្រូវបានបំផ្លាញ។
ង្វៀន វឿង
Kommentar (0)