រ៉ឺម៉កត្រាក់ទ័រក្រឡាប់ក្នុងប្រទេសឥណ្ឌា សម្លាប់មនុស្សយ៉ាងតិច២០នាក់

កាលពីថ្ងៃទី២៤ ខែកុម្ភៈ មនុស្សយ៉ាងតិច២០នាក់បានស្លាប់ និងជាច្រើននាក់ទៀតរងរបួស បន្ទាប់ពីត្រាក់ទ័ររ៉ឺម៉កដឹកពួកគេក្រឡាប់ និងធ្លាក់ចូលទៅក្នុងបឹងមួយនៅរដ្ឋ Uttar Pradesh ភាគខាងជើងនៃប្រទេសឥណ្ឌា។

យោងតាមប៉ូលីសឥណ្ឌា ឧបទ្ទវហេតុនេះបានកើតឡើងនៅក្នុងស្រុក Kasganj ចម្ងាយ 266 គីឡូម៉ែត្រភាគពាយព្យនៃរដ្ឋធានី Lucknow នៃរដ្ឋ Uttar Pradesh នៅពេលដែលរថយន្តកំពុងដឹកមនុស្សទៅកាន់ស្រុក Kadarganj ដើម្បីធ្វើពិធីងូតទឹកនៅទន្លេ Ganges ។

មន្ត្រីសុខាភិបាលក្នុងតំបន់បាននិយាយថា មនុស្ស 22 នាក់បានស្លាប់ និង 10 នាក់ទៀតរងរបួសកំពុងត្រូវបានព្យាបាលនៅមន្ទីរពេទ្យផ្សេងៗក្នុងតំបន់។ ជនរងគ្រោះភាគច្រើនជាស្ត្រី និងកុមារ។

នាយករដ្ឋមន្រ្ដីរដ្ឋ Uttar Pradesh លោក Yogi Adityanath បានចូលរួមរំលែកទុក្ខដល់ក្រុមគ្រួសារជនរងគ្រោះ និងបានប្រកាសផ្តល់ជំនួយហិរញ្ញវត្ថុដល់គ្រួសាររងគ្រោះ។