ឥណ្ឌូណេស៊ី ជម្លៀសមនុស្ស ១២,០០០នាក់ ព្រមានពីរលកយក្សស៊ូណាមិ បន្ទាប់ពីការផ្ទុះភ្នំភ្លើង

ការផ្ទុះនៅភ្នំភ្លើង Mount Ruang របស់ប្រទេសឥណ្ឌូនេស៊ី បានបិទអាកាសយានដ្ឋានចំនួនប្រាំពីរ និងបានបញ្ចេញផេះទៅឆ្ងាយដល់ប្រទេសម៉ាឡេស៊ី នេះបើយោងតាមមន្ត្រីឥណ្ឌូនេស៊ី។ អាជ្ញាធរក៏បានជម្លៀសមនុស្សរាប់ពាន់នាក់ចេញពីការភ័យខ្លាចរលកយក្សស៊ូណាមិ។

ភ្នំភ្លើង Ruang កំពុងផ្ទុះយ៉ាងខ្លាំង។ រូបថត៖ Antara

ទីភ្នាក់ងារឧតុនិយមជាតិឥណ្ឌូណេស៊ី (BMKG) បានចេញផ្សាយផែនទីនៅព្រឹកថ្ងៃទី១ ខែឧសភា បង្ហាញថា ផេះភ្នំភ្លើងបានរាលដាលដល់ប្រទេសម៉ាឡេស៊ីខាងកើត នៅលើកោះ Borneo ជាកន្លែងដែលប្រទេសទាំងបី ម៉ាឡេស៊ី ឥណ្ឌូនេស៊ី និងប្រ៊ុយណេជួបគ្នា។ ការរីករាលដាលនៃផេះភ្នំភ្លើងបានបង្ខំឱ្យអាកាសយានដ្ឋានចំនួនប្រាំពីរត្រូវបិទ រួមទាំងអាកាសយានដ្ឋានធំជាងគេនៅក្នុងខេត្ត Manado នេះបើយោងតាមសេចក្តីថ្លែងការណ៍ពីក្រុមហ៊ុនផ្តល់សេវាគ្រប់គ្រងចរាចរណ៍ផ្លូវអាកាសរបស់រដ្ឋ AirNav Indonesia ។

ភ្នំភ្លើង Ruang បានផ្ទុះឡើងចំនួនបីដងកាលពីថ្ងៃទី 30 ខែមេសា ដោយបានបញ្ចេញកម្អែភ្នំភ្លើង និងផេះចម្ងាយជាង 5 គីឡូម៉ែត្រទៅលើមេឃ ហើយបង្ខំឱ្យអាជ្ញាធរចេញបញ្ជាជម្លៀសប្រជាជនចំនួន 12,000 នាក់។ កប៉ាល់ជួយសង្គ្រោះ និងនាវាចម្បាំងមួយគ្រឿងត្រូវបានបញ្ជូនដើម្បីជួយជម្លៀសមនុស្សរាប់ពាន់នាក់ពីកោះ Tagulandang ជិតខាងទៅកាន់កោះ Siau ចំពេលមានការព្រមានថាផ្នែកមួយនៃភ្នំភ្លើងបានធ្លាក់ចូលទៅក្នុងសមុទ្រដែលអាចបង្កជារលកយក្សស៊ូណាមិ។

យោងតាម BMKG ចាប់តាំងពីការផ្ទុះលើកដំបូងនៅថ្ងៃទី 17 ខែមេសា យ៉ាងហោចណាស់ផ្ទះចំនួន 3,614 ព្រះវិហារ 2 និងសាលារៀន 1 ត្រូវបានខូចខាតដោយសារកម្អែភ្នំភ្លើង និងផេះភ្នំភ្លើង។ មជ្ឈមណ្ឌលសម្រាប់កាត់បន្ថយគ្រោះមហន្តរាយភ្នំភ្លើង និងភូគព្ភសាស្ត្រ (PVMBG) បានដំឡើងស្ថានភាពភ្នំភ្លើងពីកម្រិត 3 ដល់កម្រិតទី 4 ។

ខាន់ មីន

ប្រភព