រដ្ឋមន្ត្រីបង្រួបបង្រួមកូរ៉េខាងត្បូង ប្តេជ្ញាជំរុញឱ្យមានការបង្រួបបង្រួមគ្រួសារដែលបែកបាក់គ្នាឡើងវិញ

យោងតាមទីភ្នាក់ងារសារព័ត៌មានយ៉ុនហាប់ នៅថ្ងៃទី១០ ខែកុម្ភៈ រដ្ឋមន្ត្រីបង្រួបបង្រួមកូរ៉េខាងត្បូង លោក Kim Yung Ho បាននិយាយថា រដ្ឋាភិបាលនឹងបន្តជំរុញការជួបជុំគ្រួសារដែលបែកបាក់ដោយសង្គ្រាមកូរ៉េ (១៩៥០-១៩៥៣)។

លោក Kim Yung Ho បានធ្វើការកត់សម្គាល់បន្ទាប់ពីបានចូលរួមក្នុងការជួបជុំប្រចាំឆ្នាំនៃគ្រួសារដែលបែកគ្នា និងមនុស្សដែលកើតនៅក្នុងប្រទេសកូរ៉េខាងជើង ប៉ុន្តែឥឡូវនេះរស់នៅក្នុងប្រទេសកូរ៉េខាងត្បូង។ ក្នុងឱកាសបុណ្យចូលឆ្នាំថ្មី ពួកគេបានធ្វើដំណើរទៅកាន់ទីក្រុង Paju ក្នុងខេត្ត Kyunggi ជាប់ព្រំដែនរវាងកូរ៉េទាំងពីរ ដើម្បីឧទ្ទិសកុសលផលបុណ្យដល់បុព្វការីជន និងសាច់ញាតិនៅកូរ៉េខាងជើង។

ថ្លែងក្នុងពិធីនោះ រដ្ឋមន្ត្រី Kim Yung Ho បានអះអាងថា រដ្ឋាភិបាលនឹងមិនបោះបង់ការស្វែងរកដំណោះស្រាយជាមូលដ្ឋានចំពោះបញ្ហាទាក់ទងនឹងគ្រួសារដែលបែកគ្នានោះទេ។ លោកបានសង្កត់ធ្ងន់ថា ទីក្រុងសេអ៊ូលនឹងនៅតែបើកចំហសម្រាប់ការសន្ទនាជាមួយក្រុងព្យុងយ៉ាងលើបញ្ហាមនុស្សធម៌។

រដ្ឋមន្ត្រី Kim Yung Ho បាននិយាយថា រាល់កិច្ចខិតខំប្រឹងប្រែងដើម្បីដោះស្រាយបញ្ហាមនុស្សធម៌អន្តរកូរ៉េត្រូវតែចាប់ផ្តើមជាមួយនឹងការស្តារបណ្តាញទំនាក់ទំនងអន្តរកូរ៉េឡើងវិញ។ លោកបានអំពាវនាវឲ្យកូរ៉េខាងជើងធ្វើឲ្យបណ្តាញទំនាក់ទំនងធម្មតាដែលក្រុងព្យុងយ៉ាងបានកាត់ផ្តាច់កាលពីខែមេសា ឆ្នាំ២០២៣។

ក្នុងរយៈពេលប៉ុន្មានឆ្នាំចុងក្រោយនេះ សមាជិកវ័យចំណាស់ជាច្រើននៃគ្រួសារដែលបែកគ្នាក្នុងប្រទេសកូរ៉េខាងត្បូងបានស្លាប់ដោយមិនមានឱកាសជួបសាច់ញាតិរបស់ពួកគេនៅក្នុងប្រទេសកូរ៉េខាងជើង ដោយសារតែទំនាក់ទំនងអន្តរកូរ៉េដ៏តានតឹង។ ទិន្នន័យរបស់រដ្ឋាភិបាលកូរ៉េខាងត្បូងបង្ហាញថា ចំនួនអ្នកនៅរស់រានមានជីវិតពីគ្រួសារដែលបែកគ្នាគិតត្រឹមដំណាច់ខែវិច្ឆិកា ឆ្នាំ 2023 មានចំនួន 39,881 នាក់ ដែលក្នុងនោះ 65.6% មានអាយុចាប់ពី 80 ឆ្នាំឡើងទៅ។

ចាប់តាំងពីកិច្ចប្រជុំកំពូលដ៏សំខាន់មួយក្នុងឆ្នាំ 2000 កូរ៉េខាងត្បូង និងកូរ៉េខាងជើងបានរៀបចំការជួបជុំគ្រួសារចំនួន 21 ជុំ ដែលជាចុងក្រោយបំផុតនៅក្នុងឆ្នាំ 2018 ។

នៅឆ្នាំ 2022 កូរ៉េខាងត្បូងបានស្នើឱ្យធ្វើកិច្ចចរចាជាមួយកូរ៉េខាងជើងលើបញ្ហានៃការជួបជុំគ្រួសារដែលបែកបាក់គ្នាឡើងវិញ ប៉ុន្តែកូរ៉េខាងជើងមិនបានឆ្លើយតបនឹងសំណើនេះទេ។

ង្វៀន ខាំង

ប្រភព